पिंपरी – पवना धरण परिसरात पावसाचा जोर कायम आहे. मागील चोवीस तासात 136 मिली मीटर पावसाची नोंद झाली आहे. त्यामुळे धरणातील पाणीसाठा 5.40 टक्क्यांनी वाढला असून धरणात एकूण 36.49 टक्के पाणीसाठा आहे.
गेल्या वर्षी या तारखेला असलेल्या पाणीसाठ्यापेक्षा आता तो जास्त झाला आहे. गेल्या वर्षी 12 जुलैला पवना धरणात 33.43 टक्के पाणीसाठा होता. गेल्या काही दिवसांत सातत्याने होत असलेल्या चांगल्या पावसाने धरणातील पाणीसाठ्यात लक्षणीय वाढ झाली असून गेल्या वर्षीच्या तुलनेत असलेली तूट भरून निघाली आहे.
पिंपरी – चिंचवडसह मावळ भागातील विविध गावांचा पाण्याचा मुख्य स्रोत पवना धरण आहे. महापालिका सध्या धरणातून 510 एमएलडी पाणी उचलते. शहराला पाणीपुरवठा करण्यासाठी पवना नदीवरील रावेत – पुनावळे दरम्यान असलेल्या बंधा-यातून अशुद्ध जलउपसा करण्यात येतो. सेक्टर 23 निगडी येथे पाणी शुद्ध करुन शहरवासीयांना पुरवठा केला जातो.
पवना धरणातील परिस्थिती!
- गेल्या 24 तासात झालेला पाऊस = 136 मि.मि.
- 1 जूनपासून झालेला पाऊस = 903 मि.मि.
- गेल्या वर्षी आजच्या तारखे पर्यंत झालेला एकूण पाऊस = 574 मि.मि.
- धरणातील सध्याचा पाणीसाठा = 36.49 टक्के
- गेल्या वर्षी आजच्या तारखेचा धरणातील पाणीसाठा = 33.43 टक्के
- गेल्या 24 तासात पाणीसाठ्यात झालेली = 5.40 टक्के
- 1 जूनपासून पाणीसाठ्यात झालेली वाढ = 19.65 टक्के
