वडगाव मावळ : – मावळ तालुक्यातील सीएनजी पंपावर दिवसेंदिवस गर्दी वाढत असून कंपण्यांकडून सीएनजी गॅसचा मुबलक प्रमाणात पुरवठा होत नसल्याने सीएनजी भरण्यासाठी नागरिकांना तासंतास सीएनजी पंपावर थांबावे लागते आहे.
पेट्रोल व डिझेल या इंधनांपेक्षा सीएनजी गॅसचा दर कमी व उत्तम मायलेज असल्याने तसेच हे इंधन प्रदूषण विरहित असल्याने अनेक मध्यमवर्गीय व नोकरदारांनी छोट्या सीएनजी इंधनावर चालणाऱ्या मोटारी घेतल्या तसेच अनेक प्रवासी व मालवाहतूक करणाऱया व्यवसायीकांनी देखील सीएनजी इंधनावर चालणारी वाहने घेतल्याने सीएनजी इंधनातच्या मागणीत प्रचंड वाढ झाली आहे.
तसेच राज्य शासनाने देखिल प्रदूषण विरहित इंधनावर चालणाऱ्या वाहनांना प्रोत्साहन देण्यासाठी मागील महिन्यात सीएनजी इंधन राज्यात करमुक्त केले होते. मात्र केंद्र सरकारकडून सीएनजी इंधनाचे दर पुन्हा वाढविल्याने सीएनजी इंधनावरील वाहने घेतलेले नागरिक अडचणीत आले आहेत. मागील वर्षे भरात सीएनजी गॅस च्या दरात साधारणत: २५ ते ३० रुपयांची वाढ झाली आहे. मात्र तरी देखील पेट्रोल व डिझेलच्या तुलनेत सीएनजी गॅस स्वस्त असल्याने व वाहनांना उत्तम मायलेज मिळत असल्याने नागरिक सीएनजी गॅस पांपावर प्रचंड गर्दी करत आहेत.
मावळात महाराष्ट्र नॅचरल गॅस (एमएनजीएल) चे केवळ ४ सीएनजी पंप आहे. या सीएनजी पंपानां पुरेसा सीएनजी गॅसचा पुरवठा होत नसल्याने तसेच वीज पुरवठा खंडित होणे व तांत्रिक अडचणींमुळे नागरिकांना सीएनजी भरण्यासाठी तासंतास रांगेत उभे राहावे लागते आहे. मागील काही दिवसांपासून मावळतील सर्वच सीएनजी पंपांवर लांबच लांब रांगा लागलेल्या पाहायला मिळत आहेत. सीएनजीच्या अनियमिततेमुळे वाहन चालक त्रस्त झाले असून प्रदूषण विरहित इंधनाचा वापर म्हणजे मनस्ताप ठरत आहे. यामुळे मावळात अधिक सीएनजी पंप द्या तसेच उपलब्ध असलेल्या सीएनजी पंपावर मुबलक गॅस पुरवठा करण्याची नागरिक मागणी करत आहेत.
- सीएनजीच्या अभावामुळे छोट्या व्यवसायिकांवर परिणाम
सीएनजी इंधनावर चालणारे रिक्षा, मालवाहतूक करणारी छोटी वाहने यांना वेळेवर सीएनजी गॅस मिळत नसल्याने त्यांना आपली वाहने उभी ठेवावी लागत आहेत. यामुळे रिक्षा व छोटे टेम्पो चालवून उपजीविका करणाऱ्यांवर उपासमारीची वेळ आली आहे.
