पिंपरी ( प्रतिनिधी) बनावट सहीद्वारे केलेले अॅग्रीमेंट (करारनामा) रद्द करण्यासाठी दाम्पत्याने महिलेकडे पाच कोटी रुपयांची खंडणी मागितली. हा प्रकार मार्च २०२१ ते ४ नोव्हेंबर २०२२ या कालावधीत इंद्रायणीनगर, भोसरी येथे घडला.
संतोष भीमराव पारवे पाटील (वय ४२, रा. दापोडी) आणि त्याच्या पत्नी विरोधात गुन्हा दाखल करण्यात आला आहे. याप्रकरणी ४१ वर्षीय महिलेने भोसरी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, आरोपींनी फसवणूक व पैसे उकळण्याच्या उद्देशाने ते स्वतः डॉक्टर असल्याचा बनाव केला. त्यांचे नोंदणीकृत हॉस्पिटल व रिसर्च इन्स्टिट्यूट असल्याची खोटी माहिती केएलइ युनिव्हर्सिटी मॅनेजमेंट या संस्थेला दिली. संस्थेचा विश्वास संपादन करून संस्थेसोबत अॅग्रीमेंट केले. आरोपींनी फसवणुकीच्या इराद्याने सप्लिमेंटरी अॅग्रीमेंट बनवून त्यावर फिर्यादी, संस्थेचे रजिस्ट्रार व्ही. ए. कोटीवाले आणि डॉ. व्ही. डी. पाटील यांची बनावट सही करून यांच्या संस्थेची फिर्यादी फसवणूक केली. बनावट सहीद्वारे केलेले अॅग्रीमेंट रद्द करण्यासाठी आरोपींनी पाच कोटी रुपयांची खंडणी मागितली असल्याचे फिर्यादीत म्हटले आहे. भोसरी पोलीस तपास करत आहेत.
