पिंपरी : कसबा आणि चिंचवड विधानसभा मतदार संघातील पोट निवडणुकीची रणधुमाळी सुरू आहे. विशेष म्हणजे मनसेच्या गोटातून एक महत्त्वाची बातमी समोर आली. मनसे कसबा आणि चिंचवड पोटनिवडणुकीत भाजपला मदत करणार असल्याचं स्पष्ट झालंय. मनसे आणि भाजपमध्ये वरिष्ठ स्तरावर चर्चा झालीय. मात्र भाजपच्या प्रचारात मनसे सहभागी होणार नाही, असेही स्पष्ट करण्यात आले आहे.
याबाबत अधिक माहिती अशी की, पुण्यातील भाजपा आणि मनसे नेत्यांची बैठक पार पडली. या बैठकीला पुण्याचे भाजपाचे माजी महापौर मुरलीधर मोहोळ आणि माधुरी मिसाळ उपस्थित होत्या. तर मनसे कडून शहराध्यक्ष साईनाथ बाबर आणि मनसे नेते बाबू वागस्ककर यांनी बैठकीला हजेरी लावली होती. विशेष म्हणजे या भेटीनंतरच पुण्यात पोटनिवडणुकीत मनसे भाजपला पाठिंबा देणार असल्याची माहिती समोर आलीय.
या बैठकीनंतर कसबा आणि चिंचवड पोट निवडणुकीमध्ये मनसे भाजपला मतदान करणार असल्याची घोषणा करण्यात आली. याबद्दल वरिष्ठ पातळीवरुन आदेश देण्यात आल्याचेही सांगण्यात आले आहे.
दरम्यान, महाराष्ट्र नवनिर्माण सेनेचे अध्यक्ष राज ठाकरे यांनी ही निवडणूक बिनविरोध करण्याचा आग्रह धरला होता. तसे पत्रही त्यांनी महाविकास आघाडीला दिले होते.(Bye-Election) मात्र महाविकास आघाडीकडून ही निवडणुकी लढवण्याची तयारी आधीपासूनच सुरू करण्यात आली होती. या निवडणूकीसाठी भाजपाकडून चिंचवडमध्ये अश्विनी जगताप यांना उमेदवारी देण्यात आली आहे. तर कसब्यामध्ये हेमंत रासणे भाजपाकडून निवडणुक लढवत आहेत.
