वंचित’ला भगदाड जिल्हाध्यक्षांचा राष्ट्रवादी काँग्रेसमध्ये प्रवेश, शिंदे गटाचे अभिषेक दांगट यांचा नाना काटे यांना पाठिंबा

पिंपरी, दि. २२ – वंचित बहुजन विकास आघाडीला चिंचवड विधानसभा पोटनिवडणुकीच्या तोंडावर जबरदस्त हादरा बसला असून वंचित बहुजन विकास आघाडीचे जिल्हाध्यक्ष देवेंद्र तायडे यांनी राष्ट्रवादी काँग्रेसमध्ये राष्ट्रीय अध्यक्ष शरद पवार यांच्या उपस्थितीत प्रवेश केला. ‘वंचित’ ही भाजपाची ‘बी’ टीम बनली असून देशातील लोकशाही वाचवायची असेल तर भाजपला हद्दपार करावी लागेल. त्यामुळे आपण वंचितमधून बाहेर पडत असल्याचे तायडे यांनी यावेळी जाहीर केले. तायडे यांनी केलेल्या पक्षांतरामुळे नाना काटे यांच्या विजयाचा मार्ग अधिकच सुकर झाला आहे.

यावेळी माजी मंत्री एकनाथ खडसे, अजित गव्हाणे,  चिंचवड विधानसभा निरीक्षक सुनील आण्णा शेळके, शहराध्यक्ष अजित गव्हाणे, माजी शहराध्यक्ष संजोग वाघेरे पाटील, प्रदेश युवक चे कार्याध्यक्ष रविकांत वर्पे, नगरसेवक मोरेश्वर भोंडवे, मराठवाडा विकास संस्थेचे अरुण पवार, माजी नगरसेवक प्रसाद शेट्टी आदी मान्यवर यावेळी उपस्थित होते.

यावेळी बोलताना तायडे म्हणाले, भाजपच्या सत्ताकाळात देशातील वंचितांच्या शोषणाची परिसीमा गाठली आहे. त्यामुळे वंचित घटकाच्या संरक्षणासाठी भारतीय जनता पक्षाला मदत करणारी कोणतीही कृती टाळली पाहिजे, ही कार्यकर्त्यांची भावना होती. त्यामुळे कार्यकर्त्यांच्या मतांचा आदर करण्यासाठी राष्ट्रवादी काँग्रेसमध्ये प्रवेश करत आहे असे म्हटले आहे.

देशात भाजपकडून हुकूमशाही आणण्याचे प्रयत्न सुरू आहेत. वंचित घटकांच्या शोषणाने कळस गाठला आहे. त्यामुळे भाजपचा पराभव करणे ही काळाजी गरज बनली आहे. मात्र, वंचित बहुजन विकास आघाडीचे अध्यक्ष यांनी चिंचवड विधानसभा पोटनिवडणुकीत भाजपला पूरक ठरणारी भूमिका घेतल्याने कार्यकर्त्यांमध्ये अस्वस्थता निर्माण झाली होती. यामुळे वंचित पक्ष “भाजपाची बी टीम” बनल्याचा शिक्का बसला जातोय. असे सांगत तायडे पुढे म्हणाले, लोकशाहीच्या रक्षणासाठी आणि डॉ. बाबासाहेब आंबेडकर यांनी लिहलेल्या संविधानाच्या रक्षणासाठी समविचारी असणाऱ्या महाविकास आघाडीसोबत बी टीमची साथ सोडून विन टीममध्ये माझ्यासह आम्ही सर्व कार्यकर्ते यांनी राष्ट्रवादी काँग्रेसमध्ये प्रवेश केला आहे. आपल्यातील मतांची विभागणी ही भाजपच्या पथ्यावर पडणारी ठरेल. त्यामुळे चिंचवडच्या पोटनिवडणुकीत ही विभागणी आम्ही टाळणार आहोत.

पक्षाच्या नेत्यांनी घेतलेल्या भूमिकेच्या विरोधात पिंपरी चिंचवड शहरातील स्थानिक कार्यकर्ता असल्यामुळे एकही वंचिताचे मत दुसरीकडे जाणार नाही. पक्ष कोणासोबतही असला तरी सर्वसामान्य कार्यकर्ता आणि आम्ही नाना काटे यांना एकगठ्ठा मतदान करून विजयी करणार आहोत. बहुजन, वंचित जनतेनेही विचार करून लोकशाहीचे संरक्षण करणाऱ्या महाविकास विकास आघाडीचे उमेदवार नाना काटे यांच्याच पाठीशी ठामपणे उभे राहण्याची गरज आहे. आपली एकी भाजपचा पराभव नक्की करू शकते. त्यामुळे कोणत्याही भूलथापांना बळी न पडता वंचित घटकाने नाना काटे यांच्या पाठीशी उभे राहून त्यांना किमान ५० हजार मताधिक्क्याने विजयी करावे, असे आवाहनही तायडे यांनी यावेळी केली.

शिंदे गटाच्या शिवसेनेतही फुट

शहरात बाळसे धऱण्यापूर्वीच शिंदे यांच्या शिवसेनेला फुटीचे ग्रहन लागले असून मुख्यमंत्री एकनाथ शिंदे गटातील अभिषेक दांगट यांनी नाना काटे यांना जाहीर पाठिंबा दिला आहे. भाजपसारख्या पक्षाला सत्तेतून हद्दपार करणे व लोकशाहीच्या हितासाठी आपण विकासाचे व्हिजन असणाऱ्या आपले नाना काटे यांना मताधिक्य मिळवून देऊ असे दांगट यांनी प्रवेशावेळी सांगितले.