पिंपरी : पिंपरी चिंचवड शहरात H3N2 रुग्णांची संख्या हळूहळू वाढत आहे. त्यामुळे कोविड रुग्णाप्रमाणे H3N2 रोगाकडे दुर्लक्ष न करता महापालिकेच्या मनपा रुग्णालयात यासाठी स्वतंत्र उपचार केंद्र उभारण्यात यावे. अशी मागणी राष्ट्रवादी काँग्रेसचे ज्येष्ठ नेते व विरोधी पक्षनेते नाना काटे यांनी पिंपरी चिंचवड महापालिका प्रशासनाकडे निवेदनाद्वारे केली आहे.
पिंपरी चिंचवड शहरात H3N2 आजाराने नुकतेच एका वृद्ध व्यक्तीचे निधन झाले आहे. तसेच इतरही काही बाधित रुग्ण आहेत. यशवंतराव चव्हाण रुग्णालय येथे उपचारा दरम्यान एक मृत्यू झाला आहे, ही गंभीर बाब असून याचा गांभीर्याने विचार करावा. शहरातील या आजाराबाबत रुग्णाची वाढती संख्या पाहता नागरिकासाठी संपूर्ण पिंपरी चिंचवड शहरातील मनपा रुग्णालयामध्ये H3N2 या आजाराबाबत योग्य उपचार करण्यासाठी स्वतंत्र उपचार केंद्र उभारण्यात यावे असे काटे यांनी म्हटले आहे.
तसेच H3N2 आजारा संबधित लागणारा औषध साठा करून घ्यावा. पालिकेच्या सर्व रुग्णालयात औषध उपलब्ध करून देण्यात यावा, तसेच या आजाराचा होणारा प्रसार रोखण्यासाठी योग्य ती खबरदारी तातडीने घ्यावी. अशा सूचना संबंधित विभागाला देण्यात याव्या अशी मागणी नाना काटे यांनी दिलेल्या निवेदनात केली आहे.
