पिंपरी, दि. २७ जुलै :- मेट्रोच्या दुसऱ्या टप्प्याच्या उद्घाटनानंतर पिंपरी- चिंचवडकरांना थेट कोथरूडपर्यंत मेट्रोने प्रवास करता येणे लवकरच शक्य होणार आहे. पहिल्या टप्प्यात वनाज ते गरवारे कॉलेज आणि पिंपरी ते फुगेवाडी दरम्यान मेट्रो ट्रेनची सेवा सुरू आहे. यातून प्रवासी वाहतूकसुद्धा सुरू आहे. मात्र, दुसरा टप्पा खुला झाला नसल्यामुळे पुणेकरांना मेट्रोने दोन्ही शहरांत ये-जा करता येत नाही. आता दुसऱ्या टप्प्याचे उद्घाटन झाल्यावर पुणेकर आणि पिंपरी- चिंचवडकरांना मेट्रोने दोन्ही शहरांत प्रवास करणे शक्य होणार आहे.
दुसऱ्या टप्प्यात मेट्रोकडून गरवारे कॉलेज ते रुबी हॉलपर्यंतचा मार्ग खुला करण्याचे नियोजन आहे. याच मार्गावरील सिव्हील कोर्ट स्थानकापर्यंत मेट्रोची दुसरी ट्रेन येण्याची शक्यता आहे. त्यामुळे या स्थानकावर आल्यावर पुणेकरांना भूमिगत स्थानकामार्गे पिंपरीमध्ये जाणे शक्य होणार आहे. तर, पिंपरीवरून आल्यानंतर सिव्हील कोर्ट स्थानकातून एलिव्हेटेड स्थानकामार्गे कोथरूडमधील वनाज स्थानकापर्यंत जाता येणार आहे. त्यामुळे पुणेकर आणि पिंपरी-चिंचवडकरांना मेट्रोच्या दुसऱ्या टप्प्याच्या उद्घाटनानंतर दिलासा मिळणार आहे.
