पिंपरी : निवडणुकीचे पडघम वाजायला सुरुवात होण्यापूर्वीच पिंपरी-चिंचवडमध्ये घरवापसीसह इनकमिंग, आउटगोइंग सुरू झाले आहे. पिंपरी-चिंचवड महापालिकेतील भाजपचे माजी सभागृह नेते तथा प्रदेश प्रवक्ते एकनाथ पवार हे उद्धव ठाकरेंच्या शिवसेनेत जाहीर प्रवेश करणार आहेत. येत्या २५ तारखेला मुंबईत मातोश्रीवर उद्धव ठाकरे यांच्या उपस्थितीत ते शिवबंधन बांधणार असल्याचे विश्वसनीय वृत्त आहे. त्यामुळे भाजपला पिंपरी चिंचवड शहरात मोठा धक्का बसणार असून, आगामी निवडणुकांचे समीकरण बदलणार आहे.
२०१४ साली भाजपकडून भोसरी विधानसभेची निवडणूक लढवली होती. आमदार म्हणून निवडून आलेले महेश लांडगे यांनी भाजपकडून जागा आबादीत ठेवली आहे. त्यामुळे भोसरीतून विधानसभेला इच्छुक असलेल्या एकनाथ पवारांना तिकीट मिळण्याची आशा मावळली होती. त्यांना ‘स्कोप’ राहिला नसल्याने त्यांनी गावाकडे मराठवाड्यात लोहा-कंधार मतदारसंघातून लढण्याची मोठी तयारी सुरू केली आहे. तेथे शेकाप खालोखाल शिवसेनेचे प्राबल्य आहे, त्यामुळे विचारधारा एक असलेल्या शिवसेनेत त्यांनी प्रवेश करायचे ठरवले आहे.
भाजपचे जुने एकनिष्ठ एकनाथ पवार हे केंद्रीय मंत्री नितीन गडकरींचे खंदे समर्थक आहेत. त्यांच्या पक्ष सोडण्याचा मोठा फटका भाजपला शहरात विधानसभा आणि महापालिका निवडणुकीला बसण्याची शक्यता आहे. कारण त्यांनी २०१४ ला भोसरीतून विधानसभा लढवून ५२ हजार मते घेतली होती. 2017 च्या महापालिका निवडणुकीत त्यांच्या प्रभागातून चारही भाजपचे नगरसेवक विजय झाले होते. दोन वर्ष त्यानी महापालिकेत सभागृह नेते म्हणून उत्कृष्ट कामाचा ठसा उमटवलेला आहे. त्यामुळे विधानसभेला भोसरीत त्यांच्या उणिवेचा फटका भाजपला बसणार आहे. तो जास्त महापालिका निवडणुकीला जाणवेल. या संदर्भात त्यांच्याशी संपर्क केला असता, आपली भूमिका पत्रकार परिषद घेऊन स्पष्ट करणार असल्याचे सांगितले.
