पिंपरी (प्रतिनिधी) पिंपळे सौदागर येथे कारवाई न करण्यासाठी व गुन्हा दाखल न करण्यासाठी महिलेकडे ६० हजार रुपये लाचेची मागणी करून तडजोडीअंती ५० हजार रुपयांची लाच स्वीकारताना सांगवी पोलीस ठाण्यातील सहायक फौजदाराला लाचलुचपत प्रतिबंधक विभागाच्या (एसीबी) पथकाने बुधवारी (दि. १८) रंगेहाथ पकडले. ही कारवाई पिंपळे सौदागर – पोलीस चौकी येथे करण्यात आली.
सुनील शहाजी जाधव (वय ४९) असे रंगेहाथ पकडलेल्या सहायक फौजदाराचे नाव आहे. ते सांगवी पोलीस ठाण्यात कार्यरत आहेत. याबाबत ४५ वर्षीय महिलेने तक्रार दिली आहे. तक्रारदार महिलेच्या घराचे बांधकाम पिंपळे सौदागर येथे चालू आहे.
या बांधकामाचे कॉन्ट्रॅक्ट बांधकाम व्यावसायिक कराळे यांना दिले होते. घराच्या बांधकामाबाबत कॉन्ट्रॅक्टर कराळे व तक्रारदार यांच्यात करार झाला होता. करारानुसार बांधकाम व्यावसायिक यांनी काम वेळेत पूर्ण केले नाही, असे तक्रारदार यांनी कराळे यांना सांगितले. या तक्रारीवरून तक्रारदार यांच्याविरुद्ध कारवाई न करण्यासाठी व गुन्हा दाखल न करण्यासाठी सहायक फौजदार जाधव यांनी तक्रारदार यांच्याकडे पहिल्यांदा ६० हजार रुपये लाचेची मागणी केली. तडजोडीअंती ५० हजार रुपयांची लाचेची मागणी केली.
तसेच, ५० हजाराची लाचेची रक्कम दोन टप्प्यात देण्यास सांगितले. याप्रकरणी तक्रारदार महिलेने लाचलुचपत प्रतिबंधक विभागाकडे तक्रार केली. त्यानुसार, एसीबीच्या पथकाने बुधवारी (दि. १८) तक्रारीची पडताळणी केली आणि सापळा रचला. पिंपळे सौदागर पोलीस चौकी येथे तक्रारदार यांच्याकडून पहिल्या टप्प्यातील २५ हजार रुपये लाच स्वीकारताना जाधव यांना रंगेहाथ पकडण्यात आले. त्यांच्याविरुद्ध सांगवी पोलीस ठाण्यात गुन्हा दाखल करण्यात आला आहे. एसीबीच्या पोलीस निरीक्षक प्रणेता सांगोलकर यांच्या पथकाने ही कारवाई केली.
