पिंपरी : बनावट नोटासाठी चीनमधून कागद आयात करून पाचशे रुपयांच्या लाखोच्या नोटा बनवणारे बनावट नोटांचे रॅकेट पिंपरी चिंचवड पोलिसांनी उध्वस्त केले आहे. बनावट नोटा प्रकरणी देहूरोड पोलिसांनी सहा जणांना अटक केली. त्यांच्याकडून ७० हजार रुपये किंमतीच्या बनावट नोटा जप्त करण्यात आल्या. किवळे येथील मुकाई चौकात रविवारी (दि. २५) ही कारवाई करण्यात आली.
यातील विशेष बाब म्हणजे आरोपींनी नोटा छापण्यासाठी पुण्यातील अप्पा बळवंत चौकातून जुने ऑफसेट मशिन आणले होते. दिघी येथील मॅगझिन चौकात बनावट नोटा छापण्याचा हा उद्योग सुरू होता.
याप्रकरणी ऋतिक चंद्रमणी खडसे (२२, रा. विठ्ठलवाडी, देहुगाव, मूळ रा. मंगरुळपीर, जि. वाशिम), सुरज श्रीराम यादव (४१, रा. चहोली), आकाश विराज धंगेकर (२२, रा. आकुर्डी, मूळ रा. अंबेजोगाइ, ता. जि. धाराशिव), सुयोग दिनकर साळुंखे (३३, रा. आकुर्डी, मूळ रा. दुधवंडी, ता. पलूस, जि. सांगली), तेजस सुकदेव बल्लाळ (१९, रा. अरणगाव, ता. भूम, जि. धाराशिव), प्रणव सुनील गव्हाणे (३०, रा. आळंदी रस्ता, भोसरी) असे अटक केलेल्या आरोपींची नावे आहेत. त्यांना न्यायालयाने दिवसांची पोलिस कोठडी सुनावली. याप्रकरणी पोलीस अमंलदार किशोर परदेशी यांनी देहूरोड पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, ऋतिक खडसे हा माहिती तंत्रज्ञान (आयटी) क्षेत्रातील पदविका (डिप्लोमा) धारक आहे. तसेच, सुरज यादव हा वाहन चालक आहे. छपाइचा व्यवसाय सुरू करण्यासाठी ऋतिक, सुरज आणि त्यांचे इतर साथीदार एकत्र आले. त्यासाठी दिघी येथील मॅगझीन चौक परिसरात एक गाळा भाडेतत्त्वावर घेतला. पुण्यातील अप्पा बळवंत चौकातून छपाईचे एक जुने ऑफसेट मशिन आणले. त्यावर पत्रके तसेच इतर छपाईची कामे करण्याची त्यांनी तयारी केली. मात्र, छपाईची कामे मिळाली नाहीत. त्यामुळे गाळ्याच आणि इतर खर्च वाढला. त्यातून आर्थिक बोजा पडत असल्याने काही तरी वेगळे करण्याचे त्यांनी ठरवले होते.
