जगातली पहिली सीएनजी बाईक आज पुण्यात लाँच झाली आहे. बजाज कंपनीने सीएनजी बाईकची निर्मिती केली आहे. केंद्रीय मंत्री नितीन गडकरींच्या हस्ते बाईक लाँचचा सोहळा पार पडला. सीएनजीवर धावणारी ही पहिली दुचाकी आहे असा दावा बजाज कंपनीने केला आहे. १२५ सीसीचं इंजिन असलेली ही बाईक आहे. या बाईकसाठी केंद्र सरकारने देशात सीएनजी पंपांची संख्या वाढवावी अशी अपेक्षा राजीव बजाज यांनी व्यक्त केली आहे.
बजाज कंपनीने लाँच केली सीएनजी बाईक
पेट्रोल आणि डिझेलच्या वाढत्या दरांमुळे खासकरुन दुचाकी धारक त्रस्त आहेत. तर, सरकारकडूनही पेट्रोल-डिझेलला पर्याय शोधण्यात येतो आहे. सध्याच्या घडीला बाजारात सीएनजी वाहनांना मोठी मागणी आहे. चारचाकी सीएनजी वाहनांचीही चलती असल्याचं पाहण्यास मिळतं आहे. या सगळ्या घडामोडी घडत असतानाच बजाज या दुचाकी क्षेत्रातील नामांकित कंपनीने बजाजची सीएनजी बाईक लाँच केली आहे. ही जगातली पहिली सीएनजी बाईक असल्याचा दावा कंपनीने केला आहे.
