पिंपरी, चिंचवड व भोसरी भागात राष्ट्रवादी काँग्रेस पार्टीच्या अजित पवार गटात सध्या तणावाचं असल्याचं बोललं जात आहे. येथील अजित पवार गटातील अनेक नगरसेवक, पदाधिकारी राष्ट्रवादी काँग्रेस पार्टी शरदचंद्र पवार पक्षाच्या संपर्कात असल्याचे दावे केले जात आहेत. अजित पवार गटातील काही नगरसेवकांनी नुकतीच शरद पवार यांची भेट घेतली आहे. त्यामुळे शरद पवार हे अजित पवारांच्या बालेकिल्ल्याला (पिंपरी-चिंचवड महापालिका) भगदाड पाडण्याच्या तयारीत असल्याची चर्चा आहे.
अशातच भोसरीचे आमदार विलास लांडे (अजित पवार गट) हे देखील शरद पवारांच्या संपर्कात असल्याचं वृत्त काही वृत्तवाहिन्यांनी प्रसिद्ध केलं आहे. दरम्यान, या सर्व घडामोडींवर आमदार विलास लांडे यांचे मित्र आणि पिंपरीचे आमदार अण्णा बनसोडे यांनी प्रतिक्रिया दिली आहे.
आमदार विलास लांडे शरद पवारांच्या गटात जातील का? असा प्रश्न विचारल्यानंतर अण्णा बनसोडे म्हणाले, काल-परवा मी वृत्तवाहिन्यांवर आणि वृत्तपत्रांमध्ये अशा आशयाच्या बातम्या पाहिल्या. विलास लांडे आणि आमच्या पक्षातील काही नगरसेवकांनी शरद पवारांची भेट घेतली. मात्र माझ्या माहितीनुसार शरद पवारांना भेटल्यानंतर विलास लांडे यांनी अजित पवार यांची देखील भेट घेतली. अजित पवारांशी केलेल्या चर्चेनंतर विलास लांडे अजित पवार गटात थांबल्याचं चित्र स्पष्ट झालं आहे.
शिरूर लोकसभा मतदारसंघातून शिवसेनेचे माजी खासदार शिवाजीराव आढळराव-पाटील यांना राष्ट्रवादी काँग्रेसमध्ये घेऊन अधिकृत उमेदवारी दिल्याने नाराज झालेले भोसरीचे माजी आमदार विलास लांडे हे राष्ट्रवादी काँग्रेस शरदचंद्र पवार पक्षात जाणार असल्याची चर्चा आहे. तसेच शरद पवार गटातील काही नेते भोसरी, पिंपरी, चिंचवडमधील अजित पवार गटातील नगरसेवक आणि पदाधिकाऱ्यांना स्वगृही आणण्यासाठी त्यांच्या संपर्कात असल्याचे दावे केले जात आहेत.
