लोणावळा : कार्ला येथील आई एकविरा देवीच्या दर्शनासाठी दरवर्षी साधारण ४५ लाख भाविक येतात. त्यामुळे मंदिर परिसरात भाविकांना चांगल्या सोयीसुविधा देण्यासाठी मंदिराच्या जीर्णोद्धाराची कामं करण्यात येत आहेत. वेहेरगाव येथील श्री. एकवीरा देवी मंदिर येथे फनिक्युलर रेल्वे उभारण्यासंदर्भातील कामांना तांत्रिक मान्यता मिळाली आहे. या प्रकल्पामुळे श्री. एकविरा देवी मंदिरात ५ मिनिटांमध्ये पोहोचता येणार आहे. या प्रकल्पाची गतीनं उभारणी करताना भाविकांच्या सुरक्षिततेची देखील काळजी घ्यावी. या रेल्वे उभारणीचा प्रस्ताव पायाभूत समितीकडे सादर करण्यात आला असल्यानं हा प्रकल्प लवकर सुरू होण्यासाठी पायाभूत समितीला विनंती करण्यात यावी, अशा सूचना उपमुख्यमंत्री अजितदादा पवार यांनी अधिकाऱ्यांना दिल्या. यावेळी आमदार सुनील शेळके उपस्थित होते.
श्री. संत जगनाडे समाधी मंदिरात भाविकांचा ओघ पाहता या जागेच्या विकासासह अतिरिक्त सुविधा पुरवण्यासाठी ६६.११ कोटी रूपयांच्या आराखड्यास मान्यता देण्यात आली आहे. त्यामुळे या परिसरातील दुरूस्ती, घाट बांधकाम, पर्यटन निवास, कंपाऊंड भिंत, संग्रहालय निर्मिती आदींना प्रशासकीय मान्यता लवकरात लवकर घेण्यात यावी. निविदा प्रक्रिया पूर्ण करून कामाचे कार्यारंभ आदेश द्यावेत. या आराखड्याच्या कामाचं भूमिपूजनही पुढील महिन्याच्या सुरुवातीला करण्यात येईल. लोणावळा व वडगाव (मावळ) येथील उपजिल्हा रूग्णालयाचं उर्वरित बांधकाम तातडीनं पूर्ण करण्याचे निर्देश संबंधितांना दिले.
लोणावळा जवळील कुरवंडे येथे पर्यटनाला चालना देण्यासाठी टायगर व लायन्स पॉईंट या पर्यटनस्थळी पायाभूत सुविधा उभारण्याच्या दृष्टीनं विविध विकासकामं प्रस्तावित आहेत. या संदर्भात विकास आराखडा तयार करण्यात आला असून या परिसरात ग्लास स्कायवॉक तसंच लायन्स व टायगर पॉईंट जोडणाऱ्या दरीवरील पूल, साहसी खेळांचा विकास, प्रकाश व ध्वनी शो, रस्ता रूंदीकरण अशा विविध पायाभूत सुविधांची विकासकामं प्रस्तावित आहेत. राज्यात ग्लास स्कायवॉकसारखा पहिलाच प्रकल्प होत आहे. त्यामुळे पर्यटकांसाठी आकर्षणाचं मोठं केंद्र बनू शकणाऱ्या या पर्यटन ठिकाणी पर्यटकांच्या सुरक्षिततेला सर्वोच्च प्राधान्य देण्यात यावं. त्यासाठी आयआयटी रुरकी आणि दिल्ली येथील स्ट्रक्चरल डायनॅमिक विभागाचं मार्गदर्शन घेण्यात यावं. या प्रकल्पातील पाणीपुरवठा आणि रस्त्यांची कामं शासकीय यंत्रणेमार्फत करण्यात यावीत, तर उर्वरित पायाभूत सुविधा उभारण्याची कामं पीपीपी तत्त्वावर करण्यात यावीत, अशा सूचना दिल्या.
मावळ येथे तालुका क्रीडा संकुल बांधण्यासाठी मौजे जांभुळ येथे २ हेक्टर ६० आर एवढे क्षेत्र मंजूर करण्यात आलं आहे. यात ४०० मीटर धावनपट्टी, फुटबॉल मैदान, क्रीडांगण, स्टेडियम बिल्डींगसह इतर कामं करण्याचे प्रस्तावित आहे. तालुकास्तरिय क्रीडांगणासाठी मंजूर निधीतून कामांना सुरुवात करण्यात यावी. तसंच ज्या कामांना अतिरिक्त निधीची आवश्यकता आहे, त्याचा प्रस्ताव पाठवण्यात यावा. त्यालाही निधी देण्यात येईल, अशी ग्वाही बैठकीत दिली.
आशियाई विकास बँक अंतर्गत सुरु असलेल्या मावळ तालुक्यातील एकूण ४३ किमीचे रस्ते, वडगाव प्रशासकीय इमारतीचं बांधकाम, इंद्रायणी व पवना नदीवरील पुलांची कामं, कान्हे येथील रेल्वे उड्डाणपूल यांच्या कामांचा आढावा घेतला. ही सर्व विकासकामं कालमर्यादेत पूर्ण करण्याचे निर्देश सार्वजनिक बांधकाम विभागाच्या अधिकाऱ्यांना दिले.
पवना जलकुंभ धरण पात्र प्रकल्पग्रस्तांना योग्य न्याय देणं गरजेचं आहे. त्यासाठी शासनाच्या नावावर सातबारा असणाऱ्या, कोणतेही अतिक्रमण नसणाऱ्या जमिनींचं पहिल्या टप्प्यात पात्र शेतकऱ्यांना वाटप करण्यासाठीची प्रक्रिया तातडीनं सुरु करण्यात यावी, असं सूचित केलं.
