पिंपरी : पिंपरी चिंचवड शहर भाजपमध्ये सर्वकाही अलबेल आहे. चिंचवड विधानसभा पोट निवडणुकीनंतर शहर भाजपामध्ये अंतर्गत घडामोडींना वेग आला आहे. चिंचवड विधानसभेत शहराध्यक्ष शंकर जगताप यांना उमेदवारी दिली तर १५ नगरसेवक पक्षातून बाहेर पडणार असा इशारा दिला होता, त्याचाच प्रत्यय वाकड प्रभागात ज्यांनी भाजपचे प्रस्थ वाढवले, त्या माजी नगरसेवक संदीप कस्पटे यांनी भाजपच्या प्राथमिक सदस्यत्वाचा राजीनामा दिला आहे. पक्षाचे प्रदेशाध्यक्ष चंद्रशेखर बावनकुळे यांच्याकडे लेखी पत्र पाठवत त्यांनी भाजपला रामराम ठोकला आहे.
वाकड, पिंपळे निलख, विशालनगर, कस्पटे वस्ती प्रभागातून महापालिका निवडणुकीत भाजपचे चार सदस्यांचे पॅनल विजयी झाले. आरती चोंधे, ममता गायकवाड, संदीप कस्पटे, तुषार कामठे हे पॅनलमध्ये विजयी झाले होते. यापूर्वी भाजपचे माजी नगरसेवक तुषार कामटे यांनी पक्षातील एकाधिकारशाहीला कंटाळून राष्ट्रवादी काँग्रेस पक्षात प्रवेश केला. त्या पाठोपाठ त्याच प्रभागातील माजी नगरसेवक संदीप कस्पटे यांनी भाजप पक्षाला सोडचिट्टी दिल्याने या परिसरात भाजपला मोठा फटका बसणार आहे.
आगामी विधानसभा निवडणुकीच्या इच्छुकामध्ये चिंचवड विधानसभेतील अनेक भाजपचे माजी नगरसेवक इच्छुक आहेत. भाजपकडून नगराध्यक्ष शंकर जगताप यांना उमेदवारी देण्याबाबत हालचाली सुरू असताना माजी नगरसेवक शत्रुघ्न काटे, रहाटणी-काळेवाडीचे चंद्रकांत नखाते, थेरगाव च सिद्धेश्वर वारणे यांनीही भाजप पक्षाकडे आमदारकीसाठी मागणी करत पक्षावरून तिकीट न मिळाल्यानंतर नाराजी वाढणार आहे.
शहराध्यक्षांच्या कारभाराला वैतागून दिला राजीनामा
मी आजच पक्षाचे प्रदेशाध्यक्ष बावनकुळे यांच्याकडे माझा राजीनामा पाठविली आहे. शहराध्यक्षांच्या कारभाराला वैतागुन मी राजीनामा देत असल्याचे त्यात म्हटले आहे. अशा प्रकारे राजीनामा देणार असल्याचे आम्ही वारंवार नेत्यांना सांगितले होते, पण त्यांनी गांभीर्याने घेतले नाही असे संदीप कस्पटे यांनी सांगितले.
