पिंपरी चिंचवड : पिंपरी चिंचवडच्या तिन्ही विधानसभा मतदारसंघासाठी महाविकास आघाडीच्या उमेदवारांची घोषणा करण्याच्या प्रक्रियेत शरद पवार गटाने महत्वाचे पाऊल उचलले आहे. राष्ट्रवादी काँग्रेसच्या फुटीनंतर, अनेक पदाधिकारी अजित पवार यांच्या गटासोबत राहिल्यामुळे, शरद पवार गटाने उमेदवारीच्या इच्छुकांना उमेदवारी जाहीर करण्यात व एबी फॉर्म मिळवण्यात उठाबशा काढायला लागत आहेत.
सूत्रांच्या माहितीनुसार, उमेदवारीसाठी इच्छुक उमेदवारांना विधानसभा निवडणुकीनंतर पक्षाच्या कामात सक्रिय राहण्याची शर्त ठेवण्यात आली आहे. यामुळे अनेक इच्छुकांना त्यांच्या निष्ठेची पुनरावृत्ती करावी लागणार आहे. या अटीनंतरच त्यांना विधानसभेची उमेदवारी व एबी फॉर्म मिळणार आहे.
तिन्ही विधानसभा मतदारसंघांमध्ये शरद पवार गट आणि उद्धव ठाकरे गट यांच्यात जागांचे वितरण निश्चित करण्यात अजून एकमत झालेले नाही. मात्र, भोसरी विधानसभा मतदारसंघात शरद पवार गटाकडून उमेदवार जाहीर करण्यात येणार असल्याची माहिती मिळाली आहे. उर्वरित पिंपरी व चिंचवड विधानसभा मतदारसंघात उद्धव ठाकरे यांची शिवसेना कोणता मतदार संघात आपला उमेदवार देणार हे काही तासात समोर येणार आहे.
एकीकडे महायुतीच्या तिन्हीही विधानसभा मतदारसंघातील उमेदवार जाहीर झाल्यामुळे त्यांनी प्रचाराचा धडाका सुरू केला आहे. तर मागील चार दिवसापासून महाविकास आघाडीतील तिकीट वाटप व उमेदवार याबाबत चर्चांना पूर्णविराम मिळत नसल्यामुळे महाविकास आघाडीच्या तुलनेत महायुतीच्या उमेदवारांनी प्रचारक आघाडी घेतली आहे.
