शिवराजनगर येथील चारभुजा विष्णू मंदिरात नाना काटे यांच्या हस्ते आरती
पिंपरी-चिंचवड | प्रतिनिधी
राजस्थानी समाजाच्या परंपरेनुसार पहिला श्रावणी सोमवार विशेष श्रद्धा व भक्तीभावाने साजरा केला जातो. यानिमित्त रहाटणीतील शिवराज नगर येथे असलेल्या चारभुजा विष्णू मंदिरात काल (रविवार) सायंकाळी भव्य धार्मिक कार्यक्रमाचे आयोजन करण्यात आले होते.
कार्यक्रमात माजी विरोधी पक्षनेते नाना काटे यांच्या शुभहस्ते भगवान चारभुजा विष्णूची महाआरती करण्यात आली. या भक्तिमय वातावरणात मंदिर परिसर हरिनाम संकीर्तन, पुष्पवृष्टी व दीपप्रज्वलनाने उजळून निघाला.
नाना काटे यांनी उपस्थित सर्व राजस्थानी बांधवांना पहिल्या श्रावणी सोमवारच्या हार्दिक शुभेच्छा दिल्या आणि राजस्थानी समाजाच्या धार्मिक, सांस्कृतिक आणि सामाजिक योगदानाचे कौतुक केले.
यावेळी मंदिर कमिटीचे अध्यक्ष, उपाध्यक्ष, सर्व सदस्य, तसेच स्थानिक नागरिक व महिला वर्ग मोठ्या संख्येने उपस्थित होते. भाविकांच्या उत्स्फूर्त सहभागामुळे मंदिरात भक्तीचा माहोल निर्माण झाला होता.
सांस्कृतिक एकतेचे प्रतीक
श्रावणी सोमवारच्या निमित्ताने पारंपरिक वेशभूषा परिधान करून आलेल्या नागरिकांनी भगवान विष्णूच्या चरणी अभिषेक, आरती, प्रसाद वितरणात सहभाग घेतला. राजस्थानी समाजाची एकतेतून श्रद्धा आणि सामाजिक बांधिलकी प्रकट करणारा हा सोहळा सर्वांसाठी प्रेरणादायी ठरला.
श्रावण मासातील प्रत्येक सोमवार भक्तीचा सण मानला जातो. राजस्थानी समाजाने आपल्या धार्मिक संस्कृतीची साठवण ठेवत दिलेला हा श्रद्धेचा संगम, रहाटणी परिसरात विशेष लक्षवेधी ठरला आहे.
