वाकड : गेल्या आठवडाभरापासून भाजपचे चिंचवड विधानसभेचे भाजपा आमदार लक्ष्मण जगताप यांच्यावर बाणेर येथील jupitar रुग्णालयात उपचार सुरू आहेत. हळूहळू ते उपचाराला प्रतिसाद देत असून त्यांच्या प्रकृतीत सुधारणा होत असल्याची माहीती त्यांचे बंधू शंकर जगताप यांनी दिली आहे. त्यामूळे जगताप यांच्या चाहत्यांसाठी मोठी आनंदवार्ता मानली जात आहे.
गेली आठवडाभरापासून पिंपळे गुरव,जुनी सांगवी, नवी सांगवी व शहर परिसरात भाऊंच्या आरोग्यासाठी त्यांचे चाहते प्रार्थना करत आहेत. त्यांच्या प्रकृतीत सुधारणा होत असल्याने कार्यकर्त्यांच्या चेहऱ्यांवर हास्य फुलल्याचे वातावरण पहावयास मिळत आहे.
या आठवडाभरात राज्यातील भाजपा नेते व राष्ट्रवादी काँग्रेसचे उपमुख्यमंत्री अजितदादा पवार यांनी रुग्णालयात येऊन जगताप यांच्या प्रकृतीची विचारपूस केली. तसेच केंद्रातील भाजपचे नेते यांनी दूरध्वनीद्वारे संपर्क साधून आमदार जगताप यांच्या तब्येतीविषयी आस्थेने चौकशी केली.
भाऊच्या प्रकृतीसाठी शहरातील विविध सामाजिक संस्था, मंडळे, महिला व कार्यकर्ते यांच्याद्वारे विविध ठिकाणी देवदेवतांच्या मंदिरामध्ये जाऊन अभिषेक पूजा व महामृत्युंजय मंत्राचा जप करत आमदार लक्ष्मण जगताप यांच्या प्रकृती स्वास्थ्यासाठी प्रार्थना करण्यात आली. सर्व स्तरातून करण्यात आलेली प्रार्थना, जनतेचे आशीर्वाद, वरिष्ठ नेत्यांनी दिलेला आधार याबद्दल आमदार जगताप यांचे बंधू शंकर जगताप व विजय जगताप यांच्या वतीने कृतज्ञता व्यक्त करण्यात आली आहे. भाऊंच्या प्रकृतीत सुधारणा होत असल्याचे बंधू शंकर जगताप यांनी सांगितले आहे.
