पिंपरी: कष्टकरी जनता आघाडी आणि महाराष्ट्र रिक्षा पंचायत यांच्या वतीने ‘मी समतेचा वारकरी, सेवा हीच माझी पंढरी’ हा उपक्रम राबविण्यात येणार आहे. त्याअंतर्गत वारकऱ्यांना आरोग्य, मोफत रिक्षा, चप्पल, बूट दुरुस्ती आदींसह १८ प्रकारच्या विविध सेवा संघटनेकडून दिल्या जाणार आहेत. निगडी ते पंढरपूर यामार्गापर्यंत देण्यात येणाऱ्या सेवेचा प्रारंभ मंगळवारी (२१जून) निगडीपासून सुरु करण्यात येणार आहे.
संघटनेचे अध्यक्ष बाबा कांबळे यांनी याबाबतची माहिती दिली. आषाढी वारीत देशभरातील अनेक वारकरी पंढरीकडे विठुरायाच्या दर्शनासाठी जातात. त्यांची होणारी गैरसोय टाळण्यासाठी अनेक सेवाभावी संस्था काम करतात. अनेक कष्टकऱ्यांना थेट पंढरपूरपर्यंत जाऊन विठुरायाचे दर्शन घेता येत नाही. त्यामुळे वारकऱ्यांची सेवा करण्यातच विठ्ठलाचे दर्शन होते, अशी कष्टकऱ्यांची भावना आहे. त्यामुळेच आषाढी वारीत हा उपक्रम राबवण्यात येणार असल्याचे कांबळे यांनी सांगितले
