लोणावळा:- बिस्किक, किर्गिझस्तान येथे १७ वर्षांखालील जागतिक एशियन चॅम्पियनशिप कुस्ती स्पर्धा सुरू आहे. या स्पर्धेत मावळ तालुक्यातील सडवली गावचा राष्ट्रीय सुवर्णपदक विजेता युवा मल्ल प्रतिक शंकर देशमुख याने सातासमुद्रापार झेंडा रोवत जागतिक एशियन चॅम्पियनशिप कुस्ती स्पर्धेत ११० किलो पुढील वजनी गटात रौप्यपदक पटकावले असून, आंतरराष्ट्रीय कुस्ती स्पर्धेत पदक पटकाविणारा प्रतिक मावळचा पहिला मल्ल ठरला आहे. तर मावळ तालुक्यातील शिवली गावचे भूमीपुत्र ऑलिंपिकवीर मारुती आडकर यांच्या नंतर आंतरराष्ट्रीय कुस्ती स्पर्धेत भारताचे प्रतिनिधित्व करणारा प्रतिक देशमुख दुसरा मल्ल ठरला आहे. ऑलिंपिकवीर मारुती आडकर यांनी १९७२ साली पश्चिम जर्मनीतील म्युनिच येथे झालेल्या ऑलिंपिक स्पर्धेत भारताचे प्रतिनिधित्व केले होते.
बिस्किक, किर्गिझस्तान येथे १७ वर्षांखालील कुमार एशियन चॅम्पियनशिप स्पर्धा सुरू आहे. या स्पर्धेसाठी भारतीय कुस्ती संघाच्या वतीने दिल्ली येथील इंदिरागांधी स्टेडियममध्ये राष्ट्रीय निवड चाचणी कुस्ती स्पर्धा घेण्यात आली होती. या निवड चाचणी कुस्ती स्पर्धेत प्रतिकने ११० किलो पुढील वजनी गटात दिल्ली, पंजाब व हरियाणा राज्यातील मल्लांचा पराभव करून अजिंक्यपद पटकावत १९ ते २६ जून २०२२ या कालावधीत बिस्किक, किर्गिझस्तान येथे होणाऱ्या १७ वर्षांखालील एशियन चॅम्पियनशिप स्पर्धेसाठी निवड सार्थ ठरविली होती.
प्रतिक देशमुखने यापूर्वी झालेल्या सहा राष्ट्रीय स्पर्धांपैकी चार राष्ट्रीय स्पर्धेत एक सुवर्ण व दोन रौप्य पदके व एक कांस्यपदक अशी चार पटकावली आहेत. राजस्थान येथे झालेल्या सब ज्युनिअर विभागात ९२ किलो वजनी गटात सुवर्ण, दिल्ली आणि आसाम येथे झालेल्या राष्ट्रीय स्पर्धेत ८५ किलो वजनी गटातील रौप्यपदकांचा समावेश असुन, आसाम येथील रौप्यपदक हे खेलो इंडिया या राष्ट्रीय स्पर्धेतील आहे. तर तीन महिन्यांपूर्वी रांची झारखंड येथे झालेल्या राष्ट्रीय कुस्ती स्पर्धेत ११० किलो वजनी गटात कांस्यपदक पटकावले आहे
प्रतिक हा पुण्यातील सह्याद्री कुस्ती संकुल येथे वस्ताद विजय बराटे, संदीप पटारे व किशोर नखाते यांच्या मार्गदर्शनाखाली सराव व कुस्तीचे धडे घेत आहे.
प्रतिकने प्राप्त केलेल्या दैदिप्यमान यशाने मावळ तालुक्यात आनंदाचे वातावरण निर्माण झाले असून, त्याचे सर्व स्तरातून कौतुक होत आहे. प्रतिकने मिळविलेल्या दैदिप्यमान यशाबद्दल मावळ तालुका कुस्तीगीर संघाचे अध्यक्ष व ऑलंम्पिकवीर कुस्तीगीर पै.मारूती आडकर, पै.चंद्रकांत सातकर, महाराष्ट्र राज्य कुस्तीगीर परिषदेचे विभागीय सचिव पै. मारुती बहिरु आडकर, माजी राज्यमंत्री बाळा भेगडे, मावळ तालुका कुस्तीगीर संघाचे कार्याध्यक्ष पै. संभाजी राक्षे, पै. रामनाथ वारिंगे, उपाध्यक्ष पै. खंडू वाळूंज, पै.सचिन घोटकुले, कुस्तीगीर संघाचे सचिव पै.बंडू येवले, पै.पप्पु कालेकर, पै. तानाजी कारके, पै. निवृत्ती काकडे, पै.विष्णु शिरसाट, सल्लागार पै. राजु बच्चे, पै.देविदास कडू यांनी अभिनंदन केले आहे.
