पिंपरी ( प्रतिनिधी) सलग पाच वर्षे गणेशोत्सव साजरा करणाऱ्या पारंपरिक सार्वजनिक गणेशोत्सव मंडळाला पिंपरी चिंचवड महापालिकेच्या वतीने देण्यात येणारे विविध परवाने या वर्षीपासून पुढील ५ वर्षांसाठी देण्यात येणार असल्याची घोषणा आयुक्त तथा प्रशासक राजेश पाटील यांनी केली. तसेच शाडू मूर्ती अथवा तुरटीच्या किंवा कागदी लगद्यापासून बनविलेल्या पर्यावरणपूरक विघटनशील मूर्तीचा वापर नागरिकांनी करावा. लाकूड, दगड यापासून बनविलेल्या पुनर्वापर करता येणाऱ्या मूर्तीचा वापर करावा, असे आवाहन आयुक्त पाटील यांनी केले.
गणेशोत्सवाबाबत महापालिका तसेच शासनाच्या वेळोवेळी निर्गमित होणाऱ्या अटी व शर्तीस अधीन राहून खाजगी जागेत गणेशोत्सव साजरा करणाऱ्या पारंपरिक सार्वजनिक गणेशोत्सव मंडळाला या परवानग्या दिल्या जाणार आहेत.
- महापालिका आयुक्तांचा निर्णय : दरवर्षी अर्ज करण्याच्या प्रक्रियेतून सुटका
यंदाच्या गणेशोत्सवाच्या पार्श्वभूमीवर आयुक्त पाटील यांच्या अध्यक्षतेखाली महापालिका अधिकाऱ्यांसमवेत पूर्वनियोजन बैठक महापालिकेत पार पडली. यावेळी अतिरिक्त आयुक्त विकास ढाकणे, शहर अभियंता मकरंद निकम, सह शहर अभियंता संजय कुलकर्णी, उप आयुक्त रविकिरण घोडके, आरोग्य कार्यकारी अधिकारी गणेश देशपांडे, मुख्य सुरक्षा अधिकारी उदय जरांडे, आपत्ती व्यवस्थापन अधिकारी ओमप्रकाश वहिवाल, मुख्य अग्निशमन अधिकारी किरण गावंडे, जनता संपर्क अधिकारी किरण गायकवाड आदी उपस्थित होते.
यावर्षी राज्यात मोठ्या उत्साहात गणेशोत्सव उत्साहात साजरा होणार आहे. या उत्सवाला शहरातही मोठी परंपरा आहे. सार्वजनिक गणेश मंडळे मंडप, अग्निशमन आदी विविध परवानगी मिळण्यासाठी महापालिकेकडे अर्ज करीत असतात. त्यानुसार सार्वजनिक गणेश मंडळांना महापालिकेकडून विविध परवानग्या देण्यात येतात. यासाठी गणेश मंडळाच्या प्रतिनिधींना परवाना घेण्यासाठी महापालिका कार्यालयात दरवर्षी अर्ज करावा लागतो. मात्र यावर्षी आयुक्त पाटील यांनी खासगी जागेत मंडप उभारून गणेशोत्सव साजरा करणाऱ्या पारंपरिक सार्वजनिक गणेश मंडळांना पुढील पाच वर्षांसाठी एकदाच परवानगी देण्याचा निर्णय घेतला आहे. यामुळे महापालिकेकडील परवाना घेण्यासाठी त्याच कारणासाठी अशा मंडळांना पुढील पाच वर्षापर्यंत अर्ज सादर करावे लागणार नाहीत. त्यामुळे या मंडळांचा वेळ वाचणार आहे. यावर्षी या मंडळांना रितसर अर्ज सादर करून परवानगी घ्यावी लागणार आहे. महापालिका आणि शासनाने वेळोवेळी निर्गमित केलेल्या अटी शर्तीस अधीन राहून पुढील ५ वर्षांसाठी यावेळी महापालिकेकडून परवाना दिला जाणार आहे. परवाना देताना महापालिकेने दिलेल्या अटी शर्तीचे पालन करणे संबंधित मंडळाला बंधनकारक असणार आहे.
देशभक्तीपर देखावे करावे…..
सार्वजनिक गणेश मंडळांनी आरोग्य विषयक, सामाजिक संदेश तसेच स्वच्छता विषयक जाहिराती प्रदर्शित करण्यास पसंती द्यावी. त्याचबरोबर आरोग्य विषयक उपक्रम, रक्तदान शिबीरे आयोजित करण्यास प्राधान्य द्यावे. भारतीय स्वातंत्र्याच्या अमृत महोत्सवाचे औचित्य साधून देशभक्तीपर देखावे आणि कार्यक्रमाचे आयोजन करावे, असे आवाहनही आयुक्त पाटील यांनी केले आहे.
