- मावळचे गटविकास अधिकारी सुधिर भागवत यांचा पुढाकार
तळेगाव स्टेशन (वार्ताहर) मावळ तालुक्यातील जिल्हा परिषद शाळेत ‘गरीब विद्यार्थी शैक्षणिक मदत’ हा उपक्रम राबवला जाणार असल्याची माहिती पं.स मावळचे गट विकास अधिकारी सुधिर भागवत यांनी दिली.मावळ तालुक्याचा बराचसा भाग हा डोंगराळ स्वरुपाचा आहे.जिल्हा परिषदेच्या शाळेत अनेक विद्यार्थी हे गरीब कुटुंबातून येतात.शासनाकडून विद्यार्थ्यांना मोफत पाठ्यपुस्तके प्राप्त होतात.
परंतू वह्या,पेन्सिल्स,स्केचपेन,कंपास,दप्तर,वॉटरबँग इ.शैक्षणिक साहित्य पालकांना विकत घ्यावे लागते.अनेक पालकांची आर्थिक स्थिती बेताची असल्याने विद्यार्थ्यांना या साहित्यापासून वंचित राहावे लागते.त्याचा परिणाम विद्यार्थ्यांच्या शैक्षणिक प्रगतीवर होतो.त्यामुळे अनेक होतकरु विद्यार्थ्यांच्या शैक्षणिक विकासात अडथळा निर्माण होतो.गरीब विद्यार्थी शैक्षणिक प्रगतीपासून वंचित राहू नये यासाठी हा उपक्रम सुरु करण्यात आला आहे.
उपक्रमाचे स्वरुप…
या उपक्रमांतर्गत पं.स मधील सर्व अधिकारी,कर्मचारी,सर्व ग्रामसेवक,सर्व शिक्षक,संघटनांचे पदाधिकारी,केंद्रप्रमुख हे सर्व आपल्या वाढदिवसाचा अनावश्यक खर्च टाळून पं.स मध्ये पाच शैक्षणिक किट जमा करणार आहेत.प्रत्येक महिन्याला जमा झालेल्या या किटचे गरीब,होतकरु विद्यार्थ्यांना प्रत्यक्ष शाळेत जाऊन वाटप केले जाणार आहे.
गट विकास अधिकारी सुधिर भागवत यांच्या आवाहनाला प्रतिसाद देत कुसगांव केंद्राचे केंद्रप्रमुख मुकुंद तनपूरे यांनी आपल्या वाढदिवसाचा अनावश्यक खर्च टाळून गरीब व होतकरु विद्यार्थ्यांसाठी पाच शैक्षणिक किट पं.स मावळला भेट म्हणून दिले.
असे असेल किटचे स्वरुप…
विविध प्रकारच्या वह्या,स्केचपेन,पट्टी,पेन्सिल,चित्रकला वही,खोडरबर,शार्पनर,वॉटरबँग इ.
मावळ तालुक्यातील जिल्हा परिषदेच्या शाळेतील गरीब व होतकरु विद्यार्थ्यांना या उपक्रमातून लेखन साहित्य प्राप्त होणार आहे.सर्व अधिकारी,कर्मचारी व शिक्षकांच्या सहकार्यातून स्वेच्छेने सामाजिक बांधिलकी जपणारा हा उपक्रम गरीब कुटुंबातील विद्यार्थ्यांसाठी लाभदायी ठरणार आहे.गरीब विद्यार्थ्यांना इतर विद्यार्थ्यांप्रमाणे शिक्षणाच्या प्रवाहात आणणे व त्यांच्या शिक्षणातील अडथळा दूर करणे हा या उपक्रमाचा मुख्य उद्देश आहे. असे गट विकास अधिकारी यांनी प्रतिक्रिया दिली.
