पिंपरी : पिंपरी-चिंचवड महानगरपालिका 2 ऑक्टोबर पासून मोठ्या हौसिंग सोसायटीकडून ओला कचरा घेणे बंद करणार आहे, असे अजय चारठणकर, उपायुक्त, आरोग्य विभाग, पिंपरी चिंचवड महानगरपालिका यांनी सांगितले आहे. या मोठ्या सोसायटयांनी त्यांच्या आवारात निर्माण होणारा सर्व ओला कचरा प्रक्रिया करून त्याची विल्हेवाट लावायची आहे.
पिंपरी-चिंचवड शहरातील वाकड भागातील हौसिंग सोसायटिंना महानगरपालिकेच्या आरोग्य विभागाने पत्रे दिली आहे. या पत्रात 75 फ्लॅट्स पेक्षा जास्त फ्लॅट्स असणाऱ्या मोठ्या सोसायटी किंवा 100 किलो प्रति दिन कचरा निर्माण करणाऱ्या बल्क वेस्ट जनरेटर यांच्याकडून ओला कचरा घेणे बंद करणार आहे. या मोठ्या सोसायटीने त्यांच्या आवारात निर्माण होणाऱ्या सर्व ओला कचऱ्यावर प्रक्रिया करून त्याची विल्हेवाट लावायची आहे.
याबाबत चारठणकर यांना विचारले असता ते म्हणाले की, महानगरपालिकेच्या क्षेत्रीय कार्यालयांमार्फत अशी पत्रे सर्व मोठ्या सोसायटी यांना दिली जात आहेत. पुढील आठवड्यात क्षत्रिय कार्यालय स्तरावर आम्ही त्यांच्या हद्दीतील यांच्या प्रतिनिधींची कार्यशाळा घेऊ. या कार्यशाळेत हाउसिंग सोसायटी फेडरेशनच्या प्रतिनिधींकडून ओला कचऱ्यावर प्रक्रिया करण्यासंदर्भातील समस्या जाणून घेतल्या जातील. काही सोसायट्यांना त्यांच्या आवारामध्ये ओला कचरा प्रक्रिया करणारे युनिट उभे करण्यासाठी जागा उपलब्ध नसू शकते. तर काही सोसायटींना अशा युनिट मधून निघणाऱ्या दुर्गंधीमुळे हे युनिट आवारात नको असते. अशा सोसायटीने ऑपरेटरची नेमणूक करावी जे सोसायटीकडून ओला कचरा घेतील व त्यावर प्रक्रिया करतील पण यासाठी सोसायटीला त्यांना पैसे द्यावे लागतील.
तसेच काही महिला बचत गट आहेत जे सोसायटीकडून ओला कचरा घेतील व त्यावर प्रक्रिया करतील पण यासाठी सोसायटीला त्यांना पैसे द्यावे लागतील. अशा ऑपरेटरांची व महिला बचत गटांची ओळख हाउसिंग सोसायटी फेडरेशनच्या प्रतिनिधींना कार्यशाळेत करून दिली जाईल. पिंपरी-चिंचवड हाऊसिंग फेडरेशनचे व्हाईस चेअरमन तेजस्विनी सवाई – ढोमसे म्हणाल्या की, त्या राहत असलेल्या वाकड मधील शूनेस्ट सोसायटीमध्ये 310 फ्लॅट व 25 दुकाने आहेत. आमच्या सोसायटीमध्ये वाहने पार्किंग करण्यासाठी सुद्धा पुरेशी जागा नाही. (Housing society garbage) त्यामुळे जागे अभावी ओला कचरा प्रक्रिया केंद्र उभारू शकत नाही. तसेच ओला कचरा प्रक्रिया मशीनची किंमत 15 लाख रुपये आहे. ही मशीन 24×7 ऑपरेट करण्यासाठी कामगार ठेवावे लागतील व त्यांना पगार द्यावे लागतील. एवढा खर्च करणे आमच्या सोसायटीला परवडण्यासारखे नाही. महानगरपालिकेने बिल्डरला ओला कचरा प्रक्रिया केंद्र उभारण्यासाठी सांगावे. ओला कचरा प्रक्रिया करण्यातील समस्या संदर्भात लवकरच फेडरेशचे शिष्टमंडळ महानगरपालिका अधिकाऱ्यांना भेटणार आहे.
वाकड येथील निसर्ग पूजा सोसायटीचे अरुण देशमुख म्हणाले की स्थानिक स्वराज्य संस्थेचे काम नागरिकांचा कचरा उचलणे, दिवाबत्ती करणे, पाणीपुरवठा करणे व रस्ता करणे असे आहे. शहरामध्ये रस्ते खड्डेमय झालेले आहेत व रस्ते विविध कामांसाठी खोदून ठेवलेले आहे.
<
