पिंपरी : पिंपरी चिंचवड शहरातील राजकारणातील धुरंदर नेतृत्व, चिंचवड विधानसभा मतदारसंघाचे भाजप आमदार लक्ष्मण पांडुरंग जगताप यांचे आज प्रदीर्घ आजाराने निधन झाले. मागील अनेक महिन्यापासून ते प्रदीर्घ आजाराशी निकालाची झुंज देत होते आज त्यांची लढाई अपयशी ठरली त्यांचे वय 59 वर्षे होते. बाणेर येथील एका खासगी रुग्णालयात त्यांनी अखेरचा श्वास घेतला. त्यांच्या निधनाने पिंपरी चिंचवडसह पुणे जिल्ह्यात हळहळ व्यक्त केली जात आहे.
पिंपरी-चिंचवड शहरातील मातब्बर नेते म्हणून लक्ष्मण भाऊंची ओळख होती. आमदार जगताप महापालिकेत 20 वर्षे नगरसेवक होते. त्यांनी सन 2000 मध्ये पिंपरी-चिंचवड महापालिकेचे महापौर पदही भूषविले. महापालिका स्थायी समितीचे अध्यक्ष म्हणूनही त्यांनी काम केले. 2004 मध्ये पुणे स्थानिक स्वराज्य संस्था मतदारसंघातून अपक्ष निवडून येत विधानपरिषदेत प्रवेश केला. 2009 मध्ये चिंचवड विधानसभा मतदारसंघ अस्तित्वात आला आणि पहिल्याच निवडणुकीत लक्ष्मण जगताप अपक्ष आमदार म्हणून निवडून आले.
2014 मध्ये मावळ लोकसभा मतदारसंघातून त्यांनी शेतकरी कामगार पक्ष (शेकाप), मनसेच्या पाठिंब्यावर निवडणूक लढविली. पण, त्यात अपयश आले . त्यानंतर त्यांनी आमदार जगताप यांनी भारतीय जनता पक्षात प्रवेश केला आणि चिंचवड विधानसभा मतदारसंघावर प्रथमच भाजपचा झेंडा फडकाविला. त्यानंतर 2019 मध्येही सलग दुसऱ्यांदा आमदार जगताप विजयी झाले. त्यांच्या निधनाने पिंपरी चिंचवड शहरातील राजकीय क्षेत्रात मोठी हळहळ व्यक्त करण्यात येत आहे.
मध्यंतरी अमेरिकेहून मागविलेल्या इंजेक्शनमुळे आमदार जगतापांच्या प्रकृतीत लक्षणीय सुधारणा झाली होती. इंजेक्शन दिल्यानंतर ते खुर्चीत बसू व काही पावले चालूही लागले होते. शिवाय विधान परिषद निवडणुकीसाठी जगताप मुंबईला मतदानासाठी देखील गेले होते. त्यावेळी भाजपच्या पुण्यातील आमदार मुक्ता टिळक यांनीही आजारी असताना विधान परिषदेवेळी मतदानासाठी मुंबईत गेल्याची राज्यभर चर्चा झाली होती. त्यांचेही मागील आठवड्यात दीर्घ आजाराने निधन झालं होतं. त्यातच आज लक्ष्मण जगताप यांनी देखील आखेरचा श्वास घेतला.
