पिंपरी :- राज्यातील सर्वांत मोठा मतदार संघ असलेल्या चिंचवड विधानसभा मतदारसंघाची पोटनिवडणूक रंगतदार अवस्थेत पाहोचली आहे. या निवडणुकीच्या प्रचारासाठी अवघे ५ दिवस राहिले असल्याने भाजप, महाविकास आघाडी आणि अपक्ष उमेदवारांचा जोरदार प्रचार सुरू आहे. चिंचवड मतदारसंघात मतदारांच्या एकुण संख्येपैकी 50 टक्के मतदार हे युवा आहेत. त्यामुळे 2 लाख 58 हजार तरुण मतदारांच्या हातात भावी आमदाराचे भवितव्य आहे. या युवकांचा कौल विजयासाठी निर्णायक ठरणार आहे.
भारतीय जनता पक्षाचे आमदार लक्ष्मण जगताप यांचे 3 जानेवारी रोजी निधन झाले. त्यामुळे चिंचवड विधानसभा मतदार संघात पोटनिवडणूक होत आहे. या निवडणुकीत भाजपच्या उमेदवार अश्विनी जगताप, महाविकास आघाडीचे उमेदवार विठ्ठल ऊर्फ नाना काटे, अपक्ष राहूल कलाटे यांच्यासह 28 उमेदवार रिंगणात आहेत. मात्र, जगताप-काटे-कलाटे यांच्यातच खरी लढत होत आहे. 26 फेब्रुवारीला 510 मतदान केंद्रांवर मतदान होणार असून 2 मार्च रोजी मतमोजणी होणार आहे.
पिंपरी-चिंचवड शहराचा गेल्या काही वर्षांत झपाट्याने विकास झाला आहे. यामध्ये प्रामुख्याने चिंचवड विधानसभा मतदार संघातील विविध भागात मोठे-मोठे टॉवर उभारले आहेत. त्यामुळे या मतदार संघात श्रीमंत, मध्यम व सर्वसामान्य अशा तिनही वर्गातील नागरिकांचे वास्तव्य आहे. या मतदारसंघात 5 लाख 68 हजार 954 मतदार आहेत. यामध्ये पुरुष 3 लाख 2 हजार 946, महिला 2 लाख 65 हजार 974 तर, तृतीयपंथी 35 मतदार आहेत. मतदारांची वयोगटांनुसार वर्गवारी केल्यास 18 ते 39 या युवा वयोगटांतील मतदारांची संख्या तब्बल 2 लाख 58 हजार 42 इतकी आहे.
यंदा प्रथमच मतदार करणारे नवमतदार 4 हजार 251 आहेत.
20 ते 29 वर्षांचे 84 हजार 575 मतदार आहेत.
30 ते 39 वर्षाचे 1 लाख 73 हजार 467 मतदार आहेत.
पाठोपाठ 40 ते 49 वयोगटातील 1 लाख 45 हजार 950 प्रौढ मतदार आहेत. 50 ते 59 वयांचे 77 हजार 844, 60 ते 69 वयांचे 48 हजार 84 ज्येष्ठ मतदार आहेत. 70 वर्षांवरील 34 हजार 799 वयोवृद्ध मतदार आहेत.
या पोटनिवडणुकीत जास्तीत-जास्त मतदान व्हावे, यासाठी निवडणूक विभागाकडून पथनाट्य, कीर्तन, सोशल मीडियाच्या माध्यमातून जनजागृती केली जात आहे. तसेच, घरोघरी जाऊन व्होटर स्लीपचे वाटप केले जात आहे. मतदानाची टक्केवारी वाढावी म्हणून मायक्रो ऑब्झरवर व स्वतंत्र पथक नियुक्त केले आहे. दिव्यांग, वयोवृद्ध मतदारांसाठी सुविधा देण्यात आल्या असून मतदान केंद्रावर व्हीलचेअर, रॅम्पची सोय करण्यात आली आहे.
– सचिन ढोले, निवडणूक निर्णय अधिकारी
