रहाटणी : पिंपरी चिंचवड महापालिकेची लिटमल टेस्ट म्हणून पाहिले जाणारे चिंचवड विधानसभेची पोट निवडणूक नुकतीच संपन्न झाली. यामध्ये विद्यमान आमदार भाजपला मतदारसंघ आपल्याकडे कायम ठेवण्यात यश आले. यावेळी केवळ पंधरा दिवसात नाना काटे यांच्या रूपाने महाविकास आघाडीने चुरशीचा सामना रंगला. रहाटणी प्रभागात चारही भाजपचे नगरसेवक असताना महाविकास आघाडीतील एकजुटीमुळे आणि नाना काटे यांच्या वैयक्तिक जनसंपर्कमुळे भाजपला तगडे आव्हान उभे राहिले असल्याचे निकालातून समोर आले आहे.
स्वर्गीय लक्ष्मण जगताप यांच्या निधनाची सहानुभूती आणि मतदासंघांत “जगताप पॅटर्न”मुळेच चिंचवडमध्ये भाजपला यश मिळाले. त्याचबरोबर महाविकास आघाडीतील फुटीचा थेट फायदा भाजपला झाला असल्याचे स्पष्ट दिसून आले आहे. महापालिकेचे निवडणूक कधीही लागू शकते त्या अनुषंगाने चिंचवड विधानसभा मतदारसंघात भाजपला यश मिळवण्यासाठी मोठ्या समस्यांना तोंड द्यावे लागणार आहे असे चित्र दिसते.
वास्तविक, महाविकास आघाडीतील काही माजी नगरसेवक व पदाधिकारी यांनी अपक्ष उमेदवाराच्या पाठीमागे ताकद लावली. त्यामुळे अनेक प्रभागात भाजपला मताधिक्य मिळाले तर भाजपचे प्रभावक्षेत्र असणाऱ्या अनेक प्रभागात राष्ट्रवादी काँग्रेसचे उमेदवार विठ्ठल उर्फ नाना काटे यांनी लक्षवेधी मतदान घेतले याकडे दुर्लक्ष करून चालणार नाही. यामध्ये अपक्ष उमेदवार राहुल कलाटे यांना मिळालेले मतदान महाविकास आघाडी सोबत आले असते तर निकाल वेगळा दिसला असता. कसबा विधानसभा पोटनिवडणुकीच्या निकालातून स्थानिक महाविकास आघाडीतील एकजूट महापालिकेसाठी भाजपला धोक्याची घंटा मानली जात आहे. राज्यात सत्तेवर असणारे भाजप व शिदे गट महानगरपालिकेत मूळच्या चार प्रभाग पद्धतीने निवडणूक लढवण्याचा विचार करत आहे.
२०१७ मधील प्रभाग क्रमांक प्रभाग क्रमांक 27 – तापकीरनगर, शिवतिर्थनगर, रहाटणी गावठाण, एसएनबीपी स्कूल, आकालगंगा सोसायटी परिसर
या प्रभागात चारही भाजपचे प्रतिनिधित्व करतात तर राष्ट्रवादी काँग्रेसकडून माजी नगरसेवक सागर कोकणे व युवा टीमने यांनी प्रतिनिधित्व केले आहे. प्रभागाचे एकूण मतदान मधील मतमोजणी वेळी विसाव्या फेरीत जगताप यांना नाना काटे यांनी मागे टाकत 100467 मतांची आघाडी घेतली होती. एकूण मतदान पैकी पोट निवडणुकीत १०,९७५ लोकांनी मतदान केले. एकूण ४९.६३ % मतदान झाले.
चिंचवड विधानसभा निकाल २००९ ची निवडणूक
१) लक्ष्मण जगताप (अपक्ष) ७८ हजार ७४१
२) श्रीरंग बारणे (शिवसेना) ७२ हजार १६६
३) भाऊसाहेब भोईर (काँग्रेस) २४ हजार ६८४
२०१४ ची निवडणूक
१) लक्ष्मण जगताप (भाजप) १ लाख २३ हजार
२) राहुल कलाटे (शिवसेना) ६३ हजार ४८९
३) नाना काटे (राष्ट्रवादी) ४२ हजार ५५३
२०१९ ची निवडणूक
१) लक्ष्मण जगताप (भाजप) १ लाख ५० हजार
२) राहुल कलाटे (अपक्ष) १ लाख १२ हजार
२०२३ ची पोट निवडणूक
१) अश्विनी जगताप (भाजप) १ लाख ३५ हजार ६०३
२) नाना काटे (राष्ट्रवादी) ९९ हजार ४३५
३) राहुल कलाटे (अपक्ष) ४४ हजार ११२
विधानसभा पोटनिवडणुकीतील मतदारांची आकडेवारी पाहता भाजपच्या उमेदवार अश्विनीताई जगताप यांना ४२३५ मतदान मिळाले. राष्ट्रवादी काँग्रेसचे नाना काटे यांना ५,७०२ तर अपक्ष राहुल कलाटे यांना १०३८ मतदान मिळाले.
यामध्ये भाजपला मिळालेल्या मतापेक्षा नाना काटे यांना आघाडी घेतली. तर एकूण महाविकास आघाडी मधील विभागलेल्या मतांची बेरीज ६७४० मतांनी अधिक आहे. यामुळे पोट निवडणुकीत मतदान पाहता या भागात चारही भाजपचे नगरसेवक असताना विरोधात गेलेल्या मतदानामुळे आगामी महापालिका निवडणुकांसाठी भाजपची वाट बिकट झाल्याचे दिसून येत आहे.
त्यामुळे विरोधातील मतदान कोणाकडे जाणार आणि महापालिका निवडणुकात महाविकास आघाडी एकत्र येणार का? यावरती महापालिकेतील राजकीय गणिते ठरणार आहेत. त्यामुळे महापालिकेची लिटिल टेस्ट असणाऱ्या पोटनिवडणुकीतून महाविकास आघाडीसाठी भाजप विरोधात विरोधक कोणती व्ह्यू रचना आखतात यावरती महापालिकेची गणिते बरेच अवलंबून राहणार आहेत.
