पिंपरी : वीरशैव महात्मा बसवेश्वर पुतळा समिती आणि पिंपरी चिंचवड महानगरपालिकेच्या वतीने निगडीतीले भक्ती-शक्ती उद्यानाजवळील मोकळ्या जागेत उभारलेल्या महात्मा बसवेश्वर महाराज यांच्या पूर्णाकृती पुतळ्याचे काम पूर्ण झाले आहे. मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि विरोधी पक्षनेते अजित पवार यांच्या हस्ते या पुतळयाचे लवकरात लवकर अनावरण करावे. या सोहळयाला खासदार श्रीरंग (आप्पा) बारणे, आमदार अण्णा बनसोडे, महेशदादा लांडगे, अश्विनीताई जगताप, उमा खापरे, प्रभागातील माजी लोकप्रतिनिधी यांना निमंत्रीत करावे, अशी मागणी समितीने महापालिका प्रशासनाकडे आयुक्त तथा प्रशासक शेखर सिंह यांना लेखी निवेदनाद्वारे केली आहे.
यावेळी समितीचे अध्यक्ष नारायण बहिरवाडे, कार्याध्यक्ष शिवाजी साखरे, अण्णाराय बिरादार, गुरूराज चरंतीमठ हे उपस्थित होते. अध्यक्ष नारायण बहिरवाडे म्हणाले की, “१२ व्या शतकात महात्मा बसवेश्वर महाराज यांनी स्त्री पुरूषांना समान हक्क व अधिकार प्राप्त करून दिले. जातीभेद व अस्पृश्यता नष्ट केली, आंतरजातीय विवाह रोटी व व्यवहाराला प्रोत्साहन दिले. बुध्दीप्रामाण्यवादी विचार व अनुभवातुन शिकलेला धडा खरा मार्गदर्शक आहे, यातुनच नैतिक व अध्यात्मिक प्रगती साधता येते अशी शिकवणूक त्यांनी समाजाला दिली. जगातील पहिली लोकशाही महात्मा बसवेश्वर महाराज यांनी रूजविली. इंग्लंडच्या संसदेबाहेर देखील महात्मा बसवेश्वर यांचा अर्धाकृती पुतळा बसविण्यात आला आहे. त्याचे अनावरण भारताचे पंतप्रधान नरेंद्र मोदी साहेब यांच्या हस्ते झाले, अशा महामानवाचा पुतळा पिंपरी-चिंचवड शहरात असावा अशी मागणी शहरातील वीर लिंगायत समाजातील बांधवांनी केली.
वीरशैव लिंगायत समाजातील सर्व घटकांकडून लोकवर्गणीतून महात्मा बसवेश्वर महाराज यांचा पुतळा बनवून घेतला. शिल्पकार पंकज तांबे यांनी अतिशय सुबक पुतळा बनविला आहे, यासाठी २७ लाख रूपये खर्च आला. या पुतळयाविषयी आपुलकी रहावी यासाठी लोकवर्गणीतून पुतळा बनविण्यात आला. महात्मा बसवेश्वर यांचा पूर्णाकृती पुतळा बसविण्यासाठी समितीने महापालिकेकडे जागा मागितली, त्याबाबत महापालिका सभेत २० मे २०१६ रोजी ठराव मंजूर करण्यात आला. त्यानुसार निगडीतील भक्ती-शक्ती उद्यानातील ४५ मीटर स्पाईन आणि बीआरटी रस्त्याच्या जंक्शनजवळ असलेली मोकळी जागा महापालिकेने उपलब्ध करून दिली. या जागेत चौथारा, परिसर सुशोभिकरण करण्यासाठी सल्लागार मे. सचिन महापालिकेच्या स्थायी समितीने नमूणक केली. शहा यांची चौथ-याच्या आराखडयास राज्याच्या सार्वजनिक बांधकाम विभागाच्या मुख्य वास्तू शास्त्रज्ञ यांची मान्यता मिळालेली आहे. पुतळ्यास शासनाच्या कला संचालनालयाची परवानगी देखील मिळाली आहे. पोलीस आयुक्त, वाहतूक विभाग, महावितरण, तत्कालीन प्राधिकरण यांच्या सर्व मान्यता व ना-हरकत प्रमाणपत्र देखील घेतलेले आहे. त्यानुसार पुण्याच्या जिल्हाधिका-यांनी पुतळा बसविण्यास मान्यता दिली.
शिल्पकार पंकज तांबे यांनी साडेचार वर्षात ब्राँझच्या धातुचा महात्ता बसवेश्वर महाराज यांचा पूर्णाकृती पुतळा बनविला आहे. हा पुतळा इष्टलिंगधारक आहे. बारा फुट उंचीचा हा पुतळा आहे. वीरशैव लिंगायत समाजाचे आराध्य दैवत महादेवाची प्रतिकृती उभारली आहे. सुर्यप्रभाकृती देखील उभारली आहे. महात्मा बसवेश्वर महाराज यांनी केलेल्या कार्याचे म्युअरल्स देखील बसविण्यात आले आहेत. हा पुतळा चौथा-यावर बसवून महापालिकेकडे सुपूर्द केला आहे. पुतळा परिसराचे सुशोभिकरण, बागेची निर्मीती, वृक्षारोपण करण्यात आले आहे. विद्युत रोषणाई देखील केली आहे. सिमाभित उभारली आहे. या पुतळयाचे लवकरात लवकर अनावरण करावे अशी मागणी समितीने महापालिकेकडे केली आहे.
