पिंपरी : काल पडलेल्या अवकाळी मुसळधार पावसाने चिखली स्पाईन रोडवर सायंकाळी (दि.२९ मे) पाणी साचून तळे निर्माण झाले. पुरा सारखा वेग असलेल्या पाण्यामुळे वाहतूक व्यवस्था कोलमडून पडली. चिखली घरकुल परिसरातील भाजी मंडई परिसरात तुडुंब पाणी भरल्यामुळे नागरिकांना गुडघाभर पाण्यातून चालावे लागत होते. चिखली, जाधववाडी, घरकुल, कुदळवाडी, स्पाईन रोड परिसरातील गेली दहा वर्षे रस्ते जलमय होत आहेत.
सामाजिक कार्यकर्ते अशोक मगर म्हणाले की, घटकूल परिसरात तासभर पाऊस पडला की, सर्व रस्ते जलमय होऊन तळमजल्यावर पण पाणी तुंबते. गेली दहा वर्षे पावसाळी पाण्याचे निचरा व्यवस्थापन कोसळत आहे. संपूर्ण पावसाळ्यात आम्ही पुरासारखी स्थिती सहन करत असतो. प्रशासन व लोकप्रतिनिधी दुर्लक्ष करत आहेत.
