पिंपरी (प्रतिनिधी) – राष्ट्रवादी काँग्रेसच्या (अजित पवार गट) पिंपरी-चिंचवड शहराध्यक्षपदी अजित गव्हाणे यांची निवड करण्यात आली आहे. आता त्याच्यासोबत पाच कार्याध्यक्ष उपमुख्यमंत्री अजित पवार आणि प्रदेशाध्यक्ष सुनील तटकरे यांनी दिले आहेत. यामध्ये मोरेश्वर भोंडवे, राहूल भोसले, शाम लांडे, प्रशांत शितोळे, फजल शेख यांची कार्याध्यक्ष म्हणून निवड करण्यात आली आहे.
उपमुख्यमंत्री अजित पवार यांनी राष्ट्रवादी काँग्रेसच्या संघटनात्मक निवडी सुरू केल्या आहेत. पिंपरी-चिंचवड शहर हा राष्ट्रवादीचा बालेकिल्ला समजला जातो. शहरातील राष्ट्रवादीच्या बहुतांशी सर्वच आजी-माजी नगरसेवकांनी अजित गव्हाणे यांच्या नेतृत्त्वाखाली उपमुख्यमंत्री अजित पवार यांना पाठींबा जाहीर केला होता. त्यानंतर अजित पवार आणि प्रदेशाध्यक्ष सुनील तटकरे यांनी आज शहरातील प्रमुख पदाधिकाऱ्यांच्या निवडी मुंबईत राष्ट्रवादी काँग्रेस कार्यालयात जाहीर केल्या आहेत.
यावेळी माजी विरोधी पक्षनेते नाना काटे, माजी नगरसेवक पंकज भालेकर, राहूल भोसले, शाम लांडे, प्रभाकर वाघेरे, प्रसाद शेट्टी, जगदीश शेट्टी मयूर कलाटे मोरेश्वर भोंडवे भाऊसाहेब भोईर, प्रशांत शितोळे, फजल शेख, व इतर मान्यवर उपस्थित होते.
अजित गव्हाणे यांच्याकडेच शहराध्यक्षपदाची धुरा सोपविल्याने राष्ट्रवादीला नव्याने उभारी घेण्यास भोसरी विधानसभेसाठी एक व पिंपरी व चिंचवड या विधानसभेत प्रत्येकी दोन असे कार्याध्यक्ष दिले आहेत. यामुळे अजित पवार गटाची ताकद शहरात वाढविण्यास मोठी मदत होणार आहे.
