पिंपरी, ता. २१ : चिंचवड, भोसरी आणि पिंपरी विधानसभा मतदारसंघात जास्तीत-जास्त नवमतदार नोंदणी होण्यासाठी शनिवार (ता. १९) आणि रविवारी (ता. २०) पत्रक वाटण्यात आली. त्या पत्रकांवर अॅप डाऊनलोड करण्यासाठी स्कॅनर दिला आहे. नागरिकांनी कोड स्कॅन करून त्यात माहिती भरून आपले नाव मतदार यादीत समाविष्ट करावे, असे आवाहन मतदार नोंदणी अधिकारी नीलेश देशमुख यांनी केले आहे.
आगामी लोकसभा व विधानसभा निवडणुकांच्या पार्श्वभूमीवर पिंपरी, चिंचवड, भोसरी विधानसभा मतदारसंघात मतदार यादी पडताळणीचे काम सुरू आहे. नवमतदार नोंदणी, स्थलांतर मतदारासह मतदार यादी शुद्धीकरणाचे काम सुरू आहे. यासाठी चिंचवड विधानसभा मतदार नोंदणी कार्यालयामार्फत सोसायट्यांमध्ये कॅम्प व महाविद्यालयांत स्पर्धा घेण्यात येणार आहे. त्याबाबत मतदार नोंदणी अधिकारी देशमुख म्हणाले, “चिंचवड विधानसभा मतदारसंघ हा राज्यातील दुसऱ्या क्रमांकाचा मतदार संख्या असलेला मतदारसंघ आहे. आणखी काही मतदारांची नावे मतदार यादीत नाहीत, त्यांच्या नावाचा समावेश व्हावा, यासाठी निवडणूक आयोगाच्या अ सूचनेनुसार वेळोवेळी जनजगृतीसह विविध उपक्रम राबविण्यात येत आहेत.
नव मतदारांना मतदार यादीत नाव नोंदणी करण्यासाठी त्यांच्या जनजागृती होण्यासाठी तिन्ही मतदारसंघात पत्रके वाटप केली आहेत. त्या पत्रकांवर ॲप डाऊनलोड करण्यासाठी स्कॅनर दिला आहे. त्यामुळे नवमतदारांना कार्यालयात जाण्याची गरज नाही. केवळ क्यूआर कोड स्कॅन करून माहिती भरून आपले नाव मतदारयादीत समाविष्ट करायचे आहे.
