पुणे ; एसई सोसायटीच्या एसएनबीपी संस्थेच्या वतीने आयोजित करण्यात येणाऱ्या अखिल भारतीय स्तरावरील १६ वर्षांखालील हॉकी स्पर्धेत या वर्षी १५ राज्यांनी सहभाग नोंदवला आहे. मुला आणि मुलींची स्पर्धा एकत्रित खेळविण्यात येणार असून, दोन्ही स्पर्धा मिळून एकत्रित ३.८० लाख रुपयाची पारितोषिके दिली जाणार आहेत.
मुलींची स्पर्धा ही अखिल भारतीय महिला विजेतेपदासाठी असून, या स्पर्धेचे हे पाचवे पर्व आहे. मुलांच्या गटातील विजेत्यास १ लाख, उपविजेत्यास ५० हजार, तर तिसऱ्या क्रमांकासाठी ३० हजार रुपयांचे पारितोषिक दिले जाणार आहे. महिला गटात हीच पारितोषिक रक्कम अनुक्रमे ७५ हजार, ५० हजार आणि ३० हजार अशी निश्चित करण्यात आली आहे. मुलांच्या विभागातील स्पर्धा १ ऑक्टोबरपासून श्री शिवछत्रपती क्रीडा संकुलात सुरु होईल. महिलांची स्पर्धा ४ ऑक्टोबरपासून मोशी येथील डॉ. दशरथ भोसले हॉकी मैदानावर होणार आहे. अंतिम सामना ४ ऑक्टोबर रोजी होईल.
स्पर्धेतील शुभारंभाचा सामना ई गटातून कोलकाता वॉरियर्स आणि भोंगोर हॉकी अकादमी यांच्यात खेळविला जाईल. य स्पर्धे ला हॉकी इंडियाची मान्यता असून, स्पर्धेतील सहबागी २४ संघांना ८ विभागात विभागण्यात आले आहे. अव्वल स्थानावारील संघ उपांत्यपूर्व फेरीसाठी पात्र ठरतील.
१६ वर्षांखालील गटासाठी राष्ट्रीय स्तरावर होणारी ही एकमेव स्पर्धा आहे. या पर्वात दिल्ली, हरियाणा, पंजाब, उत्तर प्रदेश, राजस्थान, महाराष्ट्र, तामिळनाडू, तेलंगणा, कर्नाटक, आणि ओरिसा, पश्चिम बंगाल, बिहार, छत्तीसगड झारखंड या राज्यातील संघ सहभागी होणार आहे. यजमानांच्या एसएनबीपीचे प्रतिनिधीत्वल एसएनबीपी अकादमी करेल. पुण्यातील केवळ या एकाच संघाचा सहभाग असून, अन्य संघ नाशिक आणि मुंबई येथील आहेत.
महिला हॉकी स्पर्धा बाद पद्धतीने खेळवली जाणार आहे. महिला विभागात ध्यानचंद अकादमी, कोल्हापूर, गतवर्षीचे उपविजेते हॉकी नाशिक, २०२२ मध्ये तिसऱ्या क्रमांकावर आलेले रोव्हर्स अकादमी हॉकी जळगाव, साई- औरंगाबाद, ग्रासरूट्स हॉकी आणि सोलापूर हॉकी या संघांचा समावेश आहे. एसएनबीपी समूहाच्या अध्यक्षा डॉ. वृषाली भोसले म्हणाल्या, तळागाळातील प्रत्येक खेळाडू हॉकी खेळला पाहिजे हे आमचे उद्दिष्ट आहे. संयोजक फिरोज शेख म्हणाले, या स्पर्धेत सहभागी हॉकी इंडियाच्या २५ तांत्रिक अधिकाऱ्यांशिवाय ४८० खेळाडूंचा समावेश असून ३५ सामने खेळविले जाणार आहेत.
