पिंपरी (प्रतिनिधी) पिंपरी चिंचवड महापालिकेच्या रुग्णालय आणि दवाखान्यातील तक्रारींवर आता त्वरीत तोडगा निघणार आहे. आयुक्त शेखर सिंह यांच्या सूचनेनुसार ‘वॉर्ड हेल्थ अॅक्शन प्लॅन टास्क फोर्स समितीची निर्मिती – करण्यात आली आहे. क्षेत्रीय कार्यालय स्तरावर होणाऱ्या या समितीचे अध्यक्ष म्हणून क्षेत्रीय अधिकाऱ्यांची निवड करण्यात आली आहे. याव्यतिरिक्त क्षेत्रीय कार्यालयांना आर्थिक स्वरूपाचे वित्तीय अधिकार सोबतचे ‘प्रपत्र अ नुसार प्रदान करण्यास मान्यता देण्यता आली आहे, अशी माहिती आयुक्त तथा प्रशासक शेखर सिंह यांनी दिली.
राज्यातील महापालिकेने राष्ट्रीय आरोग्य प्रणाली संसाधन केंद्र (एनएचएसआरसी) द्वारे प्रदान केलेल्या ‘सिटी हेल्थ अॅक्शन प्लॅन’ आराखड्यावर काम करावे, अशा सूचना शासनाने दिल्या आहेत. त्यानुसार महानगरपालिका स्तरावर ‘वॉर्ड अॅन्ड सिटी हेल्थ अॅक्शन प्लॅन’ तयार करण्याकरिता युनिसेफच्या मदतीने प्रायोगिक तत्वावर पिंपरी चिंचवड महापालिकेची निवड करण्यात आली आहे. ‘वॉर्ड अॅन्ड सिटी हेल्थ अॅक्शन प्लॅन’ मधील तत्वे भविष्यात संपूर्ण महाराष्ट्रात मार्गदर्शक व दिशादर्शक म्हणून वापरण्यात येणार आहेत.
हा आराखडा तयार करण्याकरिता ‘वॉर्ड हेल्थ अॅक्शन प्लॅन टास्क फोर्स’ समितीची स्थापना करण्यात आली आहे. अॅक्शन प्लॅन तयार करण्यासाठी युनिसेफ व यशदा या संस्थांसमवेत बैठका घेऊन वैद्यकीय विभागामार्फत कार्यवाही करण्यात येत आहे. आठ क्षेत्रीय कार्यालयामध्ये याचे कामकाज विभागण्यात आले आहे. ‘वॉर्ड हेल्थ अॅक्शन प्लॅन’ तयार करण्यासाठी क्षेत्रीय कार्यालय स्तरावर क्षेत्रीय अधिकारी यांना वित्तीय अधिकार प्रदान करून वॉर्ड हेल्थ अॅक्शन प्लॅनच्या अनुषंगाने सर्व कामकाज करण्यात येणार आहे. हे कामकाज करण्याकरिता संबंधित रुणालयाचे ज्येष्ठ वैद्यकीय अधिकारी, क्षेत्रीय कार्यालयाची कार्यकारी अभियंता, स्थापत्य, पाणी पुरवठा, जलनि:सारण व क्षेत्रीय अधिकारी यांची संयुक्त समिती स्थापन करून निर्णय घेवून अंमलबजावणी करण्याचे निर्देश देण्यात आले आहेत.
