- तळवडे चिखली शिवरस्ता होण्याचा मार्ग सुकर, अजित पवारांनी रेडझोन भागातील रस्त्याच्या भूसंपादनाकरीता १०० टक्के नुकसान भरपाई व टी.डी.आर देण्यासाठी राष्ट्रवादी काँग्रेसcheppp शहराध्यक्ष अजित गव्हाणे व विद्यमान नगरसेवक पंकज भालेकर यांचा पाठपुरावा
पिंपरी: चाकण औद्योगिक वसाहतीकडून येणाऱ्या वाहतूकीमुळे तळवडे परिसरात वाहतूक कोंडीचा सामना करावा लागतो. हा भाग रेड झोन हद्दीत येत असल्यामुळे रस्ते विकसित होत नाहीत. तळवडे येथे रस्त्यांसाठी भूसंपादन मोबदला (टीडीआर) ५० टक्के मिळतो. त्यामुळे अनेक वर्षापासून रस्ते विकसित झाले नाहीत शहरातील इतर भागात रस्त्यासाठी मिळणारा मोबदला व टीडीआर तळवडे रेडझोन हद्दीतील शेतकऱ्यांना १०० टक्के मिळावा यासाठी शहराध्यक्ष अजित गव्हाणे व नगरसेवक पंकज भालेकर यांनी केलेल्या मागणीवरती उपमुख्यमंत्री तथा पालकमंत्री अजित पवार यांनी संबंधित विभागाला तातडीचे निर्देश दिले आहेत.
पिंपरी चिंचवड शहर व चाकण MIDC ला जोडणारा तळवडे निगडी हा एकमेव रस्ता आहे. चाकण, म्हाळुंगे MIDC, तळवडे आयटी पार्क तसेच देहू, निघोजे परिसरातुन पिंपरी चिंचवड शहरात याच रस्त्याने अवजड वाहतुक होत असते. या रस्त्यावर ४० फुटापेक्षा लांबीची वाहने व कंटेनर यांची नेहमी वर्दळ असते. त्यामुळे रस्त्यावर वाहतुक कोंडी होत तीन किलोमीटर प्रवासासाठी २ ते ३ तास वाहतुक कोंडी होत असते. या रस्त्याला पर्यायी रस्ता नसल्याने वारंवार अपघात होत असतात. तळवडे, रुपीनगर, त्रिवेणीनगर, ज्योतीबानगर व गणेशनगर भागातील रहिवाशांना वाहतुक कोंडीमुळे नाहक त्रास सहन करावा लागत आहे. त्यामुळे तळवडे ग्रामस्थ व औद्योगिक परिसरातील लघुउद्योजक पर्यायी रस्त्यासाठी वारंवार मागणी करीत असतात.
संपुर्ण तळवडे गाव व चिखली गावचा काही परिसर देहू अॅम्युनिशन डेपोच्या २००० यार्डाच्या परिघात येत असल्याने येथे कोणतेही बांधकाम अनुज्ञेय नसल्याबाबत मा. जिल्हाधिकारी कार्यालयामार्फत आदेश पारित करणेत आलेले आहेत. त्यामुळे या परिसरातील आरक्षणे व रस्त्याच्या भूसंपादनाकरीता ५० टक्के नुकसान भरपाई अथवा टी.डी.आर देणेत येतो. त्यामुळे या परिसरातील शेतकरी रस्ता विकसित करण्यास जागा देत नाहीत. परिणामी या भागातील मुख्य रस्ते विकसित होत नाहीत. तर चाकण, म्हाळुंगे MIDC, तळवडे आयटी पार्क तसेच देहू, निघोजे या परिसराला पिंपरी चिंचवड शहराशी जोडणारे सर्व मुख्य रस्ते वगळता इतर रस्ते विकसित होत नाहीत. त्यामुळे रस्त्याच्या भूसंपादनासाठी शहरातील इतर भागात मिळणाऱ्या नुकसान भरपाईच्या मुल्यांकनाप्रमाणे नुकसान भरपाई मिळाल्यास शेतकरी रस्ते विकसित करण्यास मदत होणार आहे. हीच परिस्थिती लक्षात घेऊन उपमुख्यमंत्री अजितदादा पवार यांनी राज्याच्या नगरविकास खात्याचे प्रधान सचिव असीम गुप्ता यांच्याशी बोलून महापालिका आयुक्त शेखर सिंह यांना संबंधित प्रस्ताव नगरविकास खात्याकडे पाठविण्याचे निर्देश तातडीने दिले आहेत.
त्यामुळे तळवडे चिखली शिवरस्ता व प्रभागातील रेडझोन हद्दीत असणाऱ्या अनेक रस्ते विकसित होण्यासाठी याचा उपयोग होणार आहे. बाधित शेतकऱ्यांना शंभर टक्के मोबदला मिळाला तर यापुढे प्रभागात असणारी रस्त्याची आरक्षण विकसित होण्यास मदत होणार आहे.
