पिंपरी । प्रतिनिधी
पिंपरी-चिंचवड परिसरातील तरुणांना स्वयंसिद्ध होण्यासाठी भव्य रोजगार मेळावा व मार्गदर्शन शिबीराचे आयोजन करण्यात आले आहे. या शिबिरात जास्तीत जास्त युवकांनी सहभाग नोंदवावा, असे आवाहन राष्ट्रवादी काँग्रेस पार्टीचे शहराध्यक्ष अजित गव्हाणे यांनी केले आहे.
युवक अध्यक्ष शेखर काटे आणि पदाधिकाऱ्यांच्या पुढाकाराने पदवीधर तरुणांसाठी रोजगार मेळावा व मार्गदर्शन शिबीर आयोजित केले आहे. त्याची माहिती देण्यासाठी आयोजित पत्रकार परिषदेत अजित गव्हाणे बोलत होते.
यावेळी शहराध्यक्ष अजित गव्हाणे महिला अध्यक्ष कविता आल्हाट, भाऊसाहेब भोईर, मा. विरोधी पक्षनेते विठ्ठल उर्फ नाना काटे, युवक अध्यक्ष शेखर काटे, भोसरी विधानसभा अध्यक्ष पंकज भालेकर, कविता खराडे, प्रसाद कोलते, आदी पदाधिकारी उपस्थित होते.
आकुर्डी प्राधिकरण येथील प्रा. रामकृष्ण मोरे आर्ट्स अँन्ड सायन्स कॉलेजमध्ये शनिवार, दि. १६ मार्च २०२४ रोजी सकाळी १० ते सायंकाळी ५ यावेळेत शिबीर होणार आहे. उपमुख्यमंत्री अजित पवार, युवानेते पार्थ पवार यांच्या मार्गदर्शनाखाली आणि युवक राष्ट्रवादीचे कार्याध्यक्ष सूरज चव्हाण यांच्या संकल्पनेतून उद्योगनगरीतील तरुणांना स्वयंसिद्ध होण्याची संधी या शिबिराच्या माध्यमातून निर्माण केली आहे. नामांकीत ६० कंपन्यांचे एकाच छताखाली असतील. यात फार्मा एफएमसीजी, बँकींग, आयटी, रिअल इस्टेट, इन्शुरन्स, ॲग्रीटेक, हेल्थकेअर अशा विविध क्षेत्रातील कंपन्यांमध्ये रोजगाराच्या संधी उपलब्ध आहेत. त्यामुळे तरुणांनी संधी उपलब्ध होणार आहे अशी माहिती शेखर काटे यांनी दिली.
