चिंचवड विधानसभेवरून जगताप कुटुंबात पुन्हा गृहकलह

अश्विनी लक्ष्मण जगताप म्हणाल्या, चिंचवड विधानसभेवर भाजपची ताकद आहे. महायुतीत चिंचवड विधानसभेची जागा भाजपला सुटते. दिवंगत लक्ष्मण जगताप हे चार वेळेस चिंचवड विधानसभेतून निवडून आलेले आहेत. तिथं आमची ताकद जास्त आहे. त्यामुळे चिंचवड विधानसभा मतदारसंघ हा महायुतीमध्ये भाजपकडे राहणार आहे.

दिर, शंकर जगताप यांच्याबद्दल बोलताना म्हणाल्या, लोकशाहीत प्रत्येकाला मत मांडण्याचा अधिकार आहे. बोलण्याचं व्यक्तिस्वातंत्र्य आहे. विधानसभा लढवण्यावर मी ठाम आहे. पोटनिवडणुकीच्या वेळी कुठलीही चर्चा झाली नाही. उलट, परिवारातील प्रत्येकाने पोटनिवडणुकीत झोकून देऊन ३६ हजारांच्या मताधिक्याने निवडून दिले. लोकसभेपूर्वीच माझी विधानसभेची तयारी सुरू असून निवडणूक लढवण्यावर मी ठाम आहे, असेही त्या म्हणाल्या.

नक्की कोणते जगताप निवडणुकीच्या मैदानात….

लक्ष्मण भाऊंना मानणारा मोठा मतदार चिंचवड विधानसभेत आहे. भाऊंच्या निधनानंतर भाऊंना श्रद्धांजली म्हणून अश्विनी ताईंना चिंचवड मधील नागरिकांनी विजयाची माळ गळ्यात घातली. भाऊंच्या नंतर चिंचवड विधानसभेसाठी त्यांचे बंधू व भाजपचे विद्यमान शहराध्यक्ष शंकर जगताप हेही इच्छुक होते. पोटनिवडणुकी वेळी एक पाऊल मागे घेत त्यांनी पुढील निवडणुकीवरती आपला दावा कायम ठेवला आहे. आगामी विधानसभा निवडणुकीसाठी चिंचवड विधानसभेसाठी शंकर जगताप प्रबळ इच्छुक आहेत. त्यांच्या याच आशेवर घरातूनच पायबंद घातला जात आहे का? असं प्रश्न नागरिकांना वाटत आहे.

चिंचवड विधानसभेसाठी जगताप कुटुंबीय वगळता ज्येष्ठ माजी नगरसेवक चंद्रकांत नखाते, माजी नगरसेवक शत्रुघ्न उर्फ बापू काटे यांनीही दावा ठोकला आहे. मात्र मागील काही निवडणुका पाहता भाजपकडून चिंचवड विधानसभेसाठी जगताप कुटुंबियातील उमेदवारालाच प्राधान्य देण्यात येईल असे दिसून येते.