पिंपरी : उपमुख्यमंत्री अजित पवार यांची आज माजी विरोधी पक्षनेते नाना काटे यांच्याशी झालेली भेट चिंचवड विधानसभेसाठी महत्त्वाची ठरणार आहे. चिंचवड विधानसभेत नाना काटे यांनी अपक्ष उमेदवार म्हणून अर्ज दाखल केला आहे. महायुतीकडून शंकर जगताप यांना उमेदवारी देण्यात आली आहे. या पार्श्वभूमीवर अजित पवार यांची नाना काटे यांच्याशी चर्चा राजकीय वातावरणात चर्चेचा विषय बनली आहे.
नाना काटे यांनी चिंचवड विधानसभा मतदारसंघातून बंडखोरीमुळे महायुतीचे उमेदवार शंकर जगताप यांना फटका बसू शकतो. त्यामुळे स्वतः अजित पवार आले तरच नाना काटे ऐकतील असे बोलले जात होते. आज अजित पवार नाना काटे यांच्या घरी दाखल झाले आहेत. चिंचवड मतदारसंघातील अजित पवार गटाचे १५ ते २० माजी नगरसेवकांनी नाना काटे यांना पाठिंबा दिला आहे. नाना काटे हे अपक्ष लढण्यावर ठाम राहिले तर त्याचा फटका महायुतीचे उमेदवार शंकर जगताप यांना बसू शकतो. त्यामुळे अजित पवार त्यांची मनधरणी करण्याकरिता आले आहेत. आता नेमकी त्यांच्यात काय चर्चा झाली याबाबत अजून स्पष्ट माहिती मिळू शकली नाही. त्यामुळे नाना काटे त्यांचा उमेदवारी अर्ज कायम ठेवणार की माघार घेणार हे पाहणे आता महत्त्वाचे ठरणार आहे.
