पिंपरी : शहरातील तीन लाखांपेक्षा जास्त थकबाकी असलेल्या व्यावसायिक, औद्योगिक, निवासी मालमत्ता महापालिकेच्या रडारवर आल्या आहेत. तीन लाखांपुढे थकबाकी असलेल्या १६५१, तर पाच लाखांपुढे थकबाकी असलेल्या १०३२ अशा २६८३ मालमत्ता आहेत. त्यांच्याकडे दोनशे कोटी रुपयांची थकबाकी आहे. या मालमत्ता जप्तीची कारवाई लवकरच सुरू केली जाणार आहे.
पिंपरी-चिंचवड शहरातील ६,३३,२९४ मालमत्तांची महापालिकेच्या करआकारणी व करसंकलन विभागाकडे नोंद आहे. त्यात सर्वाधिक ५,४१,१६८ मालमत्ता निवासी, तर ५७,७३३ बिगरनिवासी आहेत. तसेच, औद्याोगिक ४५६३, मोकळ्या जमिनी ११,२३२, मिश्र १६००१ आणि इतर २५०६ मालमत्ता आहेत. चालू आर्थिक वर्षातील नऊ महिन्यांत ५५० कोटी रुपयांचा मालमत्ताकर महापालिकेच्या तिजोरीत जमा झाला आहे.
आतापर्यंत तीन लाख ७९ हजार मालमत्ताधारकांनी कराचा भरणा केला आहे. त्यात थकबाकी ८९ कोटी ८० लाख रुपये, तर ४४७ कोटी ६१ लाख रुपये ही चालू मागणी आहे. त्यात सर्वाधिक ३६२ कोटी ७४ लाख रुपये ऑनलाइन जमा झाले आहेत. आरटीजीएस आणि एनईएफटीद्वारे ४२ कोटी, रोख ४१ कोटी ६६ लाख, धनादेशाद्वारे ३७ कोटी ९७ लाख रुपये जमा झाले आहेत. सर्वाधिक ८३ कोटी ६० लाखांचा मालमत्ताकर वाकड विभागीय कार्यालयाकडून जमा झाला आहे. त्या पाठोपाठ ५० कोटी ६७ लाखांचा कर थेरगाव कार्यालयात भरला गेला आहे.
गतवर्षी पहिल्या नऊ महिन्यांत ६३३ कोटी रुपये जमा झाले होते. यंदा त्या तुलनेत ८३ कोटींनी वसुली कमी झाली आहे. लोकसभा, विधानसभा निवडणुकीसाठी करसंकलन विभागातील कर्मचाऱ्यांची नियुक्ती झाली होती. त्यामुळे ठप्प झालेल्या कामकाजाचा परिणाम वसुलीवर झाला आहे.
तीन लाखांपुढे थकबाकी असलेल्या मालमत्ताधारकांकडे लक्ष केंद्रित करण्यात आले आहे. २६८३ मालमत्ताधारकांकडे २०३ कोटींची थकबाकी आहे. या मालमत्ता जप्त करण्याची कारवाई सुरू करण्यात येणार आहे. यापूर्वी जप्त केलेल्या ४३ मालमत्तांच्या लिलावाची प्रकिया लवकरच पूर्ण करण्यात येणार आहे.
– अविनाश शिंदे, सहायक आयुक्त, करआकारणी व करसंकलन विभाग, पिंपरी-चिंचवड महापालिका
