तिसऱ्या अपत्यामुळे पिंपरीतील सहायक आयुक्त श्रीनिवास दांगट यांना सेवेतून बडतर्फ

पिंपरी : लहान कुटुंबाचे प्रतिज्ञापत्र सादर करण्यास टाळाटाळ करण्याचा आरोप आणि विभागीय चौकशीत तीन अपत्ये असल्याचे स्पष्ट झाल्यानंतर महापालिकेचे सहायक आयुक्त श्रीनिवास दांगट यांना सेवेतून बडतर्फ करण्यात आले आहे. महापालिका आयुक्त शेखर सिंह यांनी ही कारवाई केली. निवृत्तीला दीड महिन्याचा कालावधी शिल्लक असतानाच त्यांच्यावर बडतर्फीची कारवाई करण्यात आली आहे. दरम्यान, या विरोधात दांगट हे उच्च न्यायालयात दाद मागणार आहेत.

दांगट हे महापालिका सेवेत लिपिक म्हणून रुजू झाले होते. महापालिका आस्थापनेवरील प्रशासन अधिकारी अभिनामाची सरळसेवेची रिक्त पदे भरतीसाठी २९ जुलै २०१३ रोजी जाहिरात प्रसिद्ध करण्यात आली होती. या भरतीच्या अटी व शर्तींच्या अधीन राहून दांगट यांना महापालिका आस्थापनेवरील प्रशासन अधिकारी या गट ह्यबह्ण या पदावर नियुक्ती देण्यात आली होती. प्रशासन अधिकारी होताना लहान कुटुंबाचे प्रतिज्ञापत्र सादर करणे बंधनकारक होते. त्याबाबत त्यांना वेळोवेळी कळवूनही प्रतिज्ञापत्र सादर केले नाही. दांगट यांच्याबाबत तक्रार प्राप्त झाल्यानंतर त्यांची विभागीय चौकशी करण्यात आली. या चौकशीत दांगट यांना तीन अपत्ये असल्याचे स्पष्ट झाले. त्यानुसार त्यांना महापालिका सेवेतून बडतर्फ करण्याचा निर्णय आयुक्तांनी घेतला.