पुणे : शहर आणि परिसरातील वाहतुकीची कोंडी सोडविण्यासाठी राष्ट्रीय आणि राज्य महामार्गालगतच्या अतिक्रमणांवरील कारवाई तिसऱ्या टप्प्यात सुरू झाली असून, आतापर्यंत सव्वाचार हजार अतिक्रमणे हटविण्यात आली आहेत. त्यामुळे महामार्गावरील वाहतुकीचा वेगही वाढला आहे. ‘पीएमआरडीए’चे महानगर आयुक्त डॉ. योगेश म्हसे यांनी ही माहिती दिली.
डॉ. म्हसे म्हणाले, ‘‘पीएमआरडीए’ने तीस दिवसांत रस्ते अतिक्रमणमुक्त करण्याचा निर्धार केला आहे. राष्ट्रीय महामार्ग आणि राज्य मार्गाच्या दोन्ही बाजूंना अनधिकृत आणि अतिक्रमण केलेली दुकाने, गाळे, बांधकामे, तसेच अन्य काही तात्पुरत्या स्वरूपाच्या बांधकामांवर संयुक्त कारवाई हाती घेण्यात आली आहे. या कारवाईचे दोन टप्पे पूर्ण झाले असून, तिसऱ्या टप्प्यातील कारवाई सुरू आहे. आतापर्यंत एकूण सव्वाचार हजार अतिक्रमणे हटविण्यात आली आहेत. ‘पीएमआरडीए’सह पुणे, पिंपरी-चिंचवड महापालिका आणि पुणे ग्रामीण पोलीस, राष्ट्रीय महामार्ग प्राधिकरण, सार्वजनिक बांधकाम विभाग, महाराष्ट्र राज्य रस्ते विकास महामंडळ, महाराष्ट्र औद्याोगिक विकास महामंडळ आणि एसएसईबी विभागांमार्फत अतिक्रमणांवर कारवाई करण्यात येत आहे.’
‘कारवाईच्या तिसऱ्या टप्प्यात पुणे-सातारा रस्त्यावरील नवले पूल ते सारोळे, हडपसर (शेवाळेवाडी) ते दिवे घाट, नवलाख उंब्रे ते चाकण, हिंजवडी परिसर ते माण या रस्त्यांसह महामार्गांवरील अतिक्रमणे हटविण्यात येत आहेत. गेल्या १० दिवसांत या परिसरातील ७५० हून अधिक अतिक्रमणे, अनधिकृत बांधकामे हटविण्यात आली. यामध्ये महामार्गासह राज्यमार्गालगत असणारी दुकाने, पत्राशेड, गाळे, टपरी आणि अनधिकृत बांधकामे काढण्यात आली आहेत,’ असे डॉ. म्हसे यांनी सांगितले.
दरम्यान, अनेक स्थानिक जागामालकांनीही स्वत:हून अतिक्रमणे काढून टाकली असल्याची माहिती ‘पीएमआरडीए’ प्रशासनाकडून देण्यात आली. तिसऱ्या टप्प्यामध्ये पूर्वीच्या पुणे-नगर रस्त्यावरील शिक्रापूर ते शिरूर, तसेच बावधन बुद्रुक ते एनडीए रस्ता येथील बकाजी कॉर्नर ते स्मशानभूमी या ठिकाणी संयुक्त कारवाई शुक्रवारपासून (२८ मार्च) करण्यात येणार आहे.
‘पीएमआरडीए’चे महानगर आयुक्त डॉ. योगेश म्हसे, अतिरिक्त पोलीस आयुक्त मनोज पाटील, पोलीस अधीक्षक तथा दक्षता अधिकारी अमोल तांबे यांच्या मार्गदर्शनाखाली सह आयुक्त डॉ. दीप्ती सूर्यवंशी-पाटील, राष्ट्रीय महामार्ग प्राधिकरणाचे प्रकल्प संचालक संजय कदम, उपजिल्हाधिकारी प्रमोद कुदळे, वाहतूक विभागाचे उपायुक्त बापू बांगर, कार्यकारी अभियंता शैलजा पाटील, सदानंद लिटके यांच्या पथकाकडून ही कारवाई करण्यात येत आहे.
