पिंपरी, दि. २८ (प्रतिनिधी)- दिव्यांग व्यक्तीशी विवाह केल्यास त्यांच्या – संसारासाठी महापालिकेच्या वतीने १ लाख रूपयांचे अर्थसहाय्य देण्यात येते. गेल्या पाच वर्षांत या योजनेचा शहरातील ६३ जोडप्यांनी लाभ घेतला आहे.
पिंपरी-चिंचवड महापालिकेच्या समाज विकास विभागामार्फत आर्थिक दुर्बल घटकातील नागरिकांसाठी विविध कल्याणकारी योजना राबविण्यात येत आहेत. याचबरोबर शहरातील दिव्यांग व्यक्तींसाठी दिव्यांग कक्षामार्फत विविध योजना राबविण्यात येत आहे. या योजनांचा शहरातील दिव्यांग बांधवांना मोठा आधार होत असून जीवन सुकर होण्यासाठी लाभ होत आहे.
दिव्यांग व्यक्तींना समाजात वावरता अनेक अडचणींचा सामना करावा लागतो. त्यामुळे ४० टक्यांपेक्षा जास्त अपंगत्वाचे प्रमाण असल्यास अशा दिव्यांगाशी अव्यंग व्यक्तीने विवाह केल्यास त्यांना पालिकेतर्फे प्रोत्साहन म्हणून एक लाख रूपये देण्यात येतात. ही योजना महापालिकेने २०१८ पासून सुरू केली असून आत्तापर्यंत ६३ जणांनी या योजनेला लाभ घेतला आहे. २०१८ ला ही योजना सुरू करण्यात आली असली तरी पहिल्या वर्षी एकाही जोडप्याने या योजनेचा लाभ घेतला नाही. त्यानंतर २०१९-२० मध्ये २०, २०२०-२१ मध्ये २० २०२१ २२ मध्ये १९ तर २०२०२- २३ मध्ये जुलैअखेर ४ अशा ६३ जणांना ६३ लाख रूपयांचा लाभ देण्यात आला आहे. या योजनेसाठी दरवर्षी २० लाखांची तरतूद करण्यात येते.
याबाबत समाज विकास विभागाचे उपायुक्त चंद्रकांत इंदलकर म्हणाले, दिव्यांग व्यक्तींना दररोजच्या आयुष्यात जगताना सामना अनेक अडी-अडचणींचा करावा लागतो. दिव्यांग व्यक्तींप्रती समाजाचा दृष्टीकोन बदलावा, यासाठी महापालिकेचा समाज विकास विभाग सातत्याने प्रयत्न करत आहे. याच अनुषंगाने दिव्यांग व्यक्तीशी अव्यंग व्यक्तीने विवाह केल्यास त्यांच्या संसाराला हातभार म्हणून पालिका १ लाखांची मदत करते. यामधून त्या जोडप्याला जगण्याची नवी उमेद मिळावी, हाच या योजनेचा मुख्य हेतू आहे.
