मुंबई : महाराष्ट्राच्या राजकारणात गेल्या तीन महिन्यांपासून ज्या अंधेरी पूर्व पोटनिवडणुकीमुळे वातावरण तापलं होतं, अखेर त्याच पोटनिवडणुकीचा निकाल आज समोर येतोय. या निवडणुकीदरम्यान भाजपवर उमेदवार मागे घेण्याबाबतचा दबाव वाढल्यानंतर भाजपने आपला उमेदवार मागे घेतला होता. त्यानंतर काही अपेक्षांनी उमेदवार अर्ज ठेवल्यानंतर निवडणूक लागली यात उद्धव ठाकरे यांच्या शिवसेनेचे ऋतुजा लटके यांचा एकतर्फी विजय झाला आहे.
अंधेरी पोटनिवडणुकीचा अंतिम निकाल
ऋतुजा लटके : 66247 मते
NOTA : 12776
राजेश त्रिपाठी : 1569
या पोटनिवडणुकीच्या रणांगणात भाजप उमेदवार असता तर ही निवडणूक अटीतटीची ठरली असती. भाजपने उमेदवार मागे घेतल्याने शिवसेना उद्धव बाळासाहेब ठाकरे पक्षाच्या उमेदवार ऋतुजा लटके यांचा विजयाचा मार्ग मोकळा झाला होता. तरीही भाजप वगळता इतर उमेदवारांनी अर्ज मागे न घेतल्याने ही निवडणूक बिनविरोध न ठरता या जागेसाठी मतदान झालं. या निवडणुकीचा निकाल आज जाहीर झाला. या निवडणुकीत ऋतुजा लटके यांचाच विजय जवळपास निश्चित झाला आहे. ऋतुजा लटके यांना मतमोजणीच्या तेराव्या फेरी अंती 48 हजार 15 मतं मिळाली आहेत.
मुख्यमंत्री एकनाथ शिंदे यांनी शिवसेनेच्या 40 आमदारांसह मोठी बंडखोरी केल्याने शिवसेनेला मोठं खिंडार पडलं होतं. या संकट काळात पक्ष प्रमुख उद्धव ठाकरे यांच्यापुढील आव्हान वाढलं होतं. विशेष म्हणजे ठाकरे गटाला डिवचण्यासाठी अंधेरी पूर्व पोटनिवडणुकीसाठी भाजपकडून आणि शिंदे गटाकडून रणनीती आखली जात होती. मात्र उद्धव ठाकरे यांच्या शिवसेनेकडे सहानुभूतीची लाट उसळल्यामुळे शिंदे फडणवीस सरकारने सावध भूमिका घेत आपला उमेदवार मागे घेतला.
काही महिन्यांपूर्वी अंधेरी पूर्वचे दिवंगत आमदार रमेश लटके यांचं निधन झालं होतं. त्यामुळे ती जागा खाली झाली होती. नियमानुसार लोकप्रतिनिधीच्या निधनानंतर पुढच्या सहा महिन्यात निवडणूक घेणं गरजेचं असतं. त्यानुसार अंधेरी पूर्व पोटनिवडणूक घेण्यात आली. यात अपेक्षेप्रमाणे दिवंगत आमदार रमेश लटके यांच्या पत्नी ऋतुजा लटके यांचा विजय झाला आहे.
