- श्री मोरया गोसावी मंदिरात विविध पारंपरिक कार्यक्रम; भाविकांची गर्दी
चिंचवड (प्रतिनिधी) चिंचवड देवस्थान ट्रस्ट, पिंपरी-चिंचवड महापालिका आणि ग्रामस्थांतर्फे आयोजित श्रीमन् महासाधू श्री मोरया गोसावी महाराज यांच्या ४६१ व्या संजीवन समाधी महोत्सवाचा बुधवारी (दि. १४) उत्साहात सांगता झाली. मोरयाच्या जयघोषात समाधी मंदिरावर पुष्पवृष्टी करण्यात आली. तसेच महाप्रसादाचे वाटप करण्यात आले. ९० हजारांहून अधिक भाविकांनी महाप्रसादाचा लाभ घेतला.
१० ते १४ डिसेंबरच्या या कालावधीत महोत्सवात विविध कार्यक्रम घेण्यात आले. यामध्ये सुगम संगीत, जुगलबंदी, व्याख्यान, योगासन वर्ग, आरोग्य व रक्तदान शिबिरांसह विविध समाजोपयोगी उपक्रम तसेच सनई-चौघडा वादन, श्री मोरया गोसावी चरित्र पठण, सौरयाग, रक्तदान शिविर, नेत्र व दंत चिकित्सा आणि आरोग्य शिबिराचा समावेश होता.
मुख्य विश्वस्त मंदार महाराज देव यांच्या हस्ते बुधवारी पहाटे साडेचार वाजता श्री मोरया गोसावी संजीवन समाधीची महापूजा झाली. सकाळी सात वाजता समाधी मंदिरावर पुष्पवृष्टी करण्यात आली. चरित्र पठण आणि चिंचवड येथील स्वराज्य ढोलताशा पथकाची मानवंदना झाली. रामायणाचार्य समाधान महाराज शर्मा यांचे काल्याचे कीर्तन झाले. दुपारी १२ वाजता महाप्रसादाला सुरुवात झाली. सायंकाळपर्यंत ९० हजारांहून अधिक भाविकांनी महाप्रसादाचा लाभ घेतला. श्री मोरया गोसावी समाधी मंदिर, श्री मंगलमूर्ती वाडा येथे रात्री १० वाजता धूपारती होऊन महोत्सवाची सांगता झाली.
