पिंपरी : चिंचवड व कसबा निवडणुकीत महाविकास आघाडीने सत्ताधारी भाजपला कडवी झुंज दिली. यात कसब्यात काँग्रेसचे रवींद्र धंगेकर यांनी भाजपचे उमेदवार हेमंत रासने यांना धूळ चारत विजय मिळवला तर चिंचवड मतदारसंघात भाजपच्या अश्विनी जगताप यांचा बालेकिल्ला असणाऱ्या पिंपळे गुरव सांगवी परिसरातील मतमोजणी होताना स्वर्गीय लक्ष्मण जगताप यांच्या सहानुभूतीचा फॅक्टर मोठ्या प्रमाणात चाललेला दिसून आला.
मतमोजणीच्या सुरुवातीपासूनच पाच ते दहा हजार मतांच्या आघाडीने अश्विनी जगताप आघाडी वरती होत्या. त्यात नाना काटे आणि राहुल कलाटे यांचा बालेकिल्ला असणाऱ्या पिंपळे सौदागर, वाकड, रहाटणी परिसरातील मतदान मोजणी पूर्ण झाली आहे. याठिकाणी जगताप यांनी आपली आघाडी कायम ठेवली होती. त्यानंतर झालेल्या मत मोजणीत सांगवी, नवी सांगवी, पिंपळे गुरव या भागातील मतमोजणीला सुरुवात झाली. त्यावेळी १० हजाराचे आघाडीवर असणारे जगताप यांनी थेट २५ हजारांच्या पेक्षा अधिक मतांची आघाडी घेतली आणि विजयी झाल्या.
अश्विनी जगताप यांना एकूण १,१२,११३ मते मिळाली. महाविकास आघाडीचे उमेदवार नाना काटे यांना ८४,४८४ मते मिळाली आहेत. तर अपक्ष उमेदवार राहुल कलाटे यांना केवळ ३८,९०० मते मिळवत समाधान मानावे लागले आहे.
यामध्ये अपक्ष उमेदवार राहुल कलाटे यांना वंचित बहुजन आघाडी पक्षातील मतदानाचा टक्का मिळाला. कलाटे यांना मिळालेले मतदान भाजपच्या पथ्यावर पडल्याचे दिसत आहे. अपक्ष राहुल कलाटे यांना मिळणाऱ्या ३८,९०० मतामुळे महाविकास आघाडीचे नाना काटे यांच्या मतांच्या आकडेवारी मागे पडताना दिसून येते. चिंचवडमध्ये भाजपच्या अश्विनी जगताप यांची कायम आघाडीवर दिसून येत आहेत आता त्यांना केवळ विजय घोषित करण्याचे बाकी आहे.
