पिंपरी : पिंपरी चिंचवड शहरातील पाणी पुरवठा विभागाच्या रावेत येथील अशुद्ध जलउपसा केंद्रातील विद्युत विषयक देखभाल दुरुस्तीची कामे करणे. सेक्टर क्र. २३ निगडी येथील जलशुध्दीकरण केंद्रातील विद्युत व पाणीपुरवठा विषयक नियमित देखभाल दुरुस्तीची आवश्यक कामे करणे. तसेच शहरातील पाणी वितरण व्यवस्थेतील दुरुस्तीची कामे हाती घेणे आवश्यक असल्यामुळे गुरुवार दि. २७ एप्रिल २०२३ रोजी पिंपरी चिंचवड शहरातील सकाळचा पाणीपुरवठा नियमीत वेळेनुसार होणार असुन संध्याकाळचा पाणीपुरवठा बंद राहणार आहे. अशी माहिती सह शहर अभियंता, पाणी पुरवठा विभाग, पिंपरी चिंचवड महानगरपालिका यांनी दिली आहे.
भविष्यातील पाणीपुरवठा सुरळीत होण्यासाठी दुरूस्तीच्या कामासाठी सर्व पाणीपुरवठ्याची यंत्रणा बंद ठेवण्यात येणार आहेत. त्यामुळे शहरातील सर्व भागात दुस-या दिवशी म्हणजेच शुक्रवार दि. २८/०४/२०२३ रोजी होणारा सकाळचा पाणीपुरवठा अपुरा व कमी दाबाने होण्याची शक्यता आहे. तरी नागरिकांनी पालिकेकडून मिळणारा उपलब्ध पाण्याचा पुरेसा साठा करून ठेवावा. तसेच काटकसरीने वापर करुन म.न.पा. स सहकार्य करावे असे आवाहन करण्यात आले आहे.
