शहरातून दररोज सातजण होताहेत बेपत्ता; अल्पवयीन मुलींचे प्रमाण धक्कादायक

पिंपरी :  शहरातून दररोज सरासरी सातजण बेपत्ता होत आहेत. चालू वर्षात जानेवारी ते एप्रिल या कालावधीत 883 जण शहरातून बेपत्ता झाले आहेत. बेपत्ता झालेल्या नागरिकांना शोधण्यासाठी पोलिसांकडून मिसिंग ड्राइव्ह नावाने मोहीम राबवली जाते. मात्र मागील काही महिन्यांपासून अशी मोहीम देखील राबविण्यात आलेली नाही.

स्मृतिभ्रंश आणि यासारख्या इतर आजारांमुळे नागरिकांचे स्वतःवर नियंत्रण राहत नाही. ते अचानक बाहेर पडतात आणि बेपत्ता होतात. रावेत पोलीस ठाण्याच्या हद्दीतून एक वृद्ध व्यक्ती दळण आणण्यासाठी घराबाहेर पडली आणि बेपत्ता झाली. पोलिसांच्या सतर्कतेमुळे हिंजवडी परिसरात तिचा शोध लागला आणि तब्बल 16 तासानंतर वृद्ध व्यक्ती घरी परतली. आई-वडिलांच्या भांडणात मुलांचा ताबा मिळविण्यासाठी पालकांकडून एकमेकांच्या परवानगीशिवाय मुलांना नेले जाते. अशा प्रकरणात देखील मुलांच्या बेपत्ता होण्याची तक्रार नोंदवली जाते.

देहूरोड पोलीस ठाण्याच्या हद्दीतून दोन लहान मुले बेपत्ता झाली. पोलिसांनी अवघ्या चोवीस तासात त्यांचा शोध लावला. पण त्या मुलांचे बेपत्ता होण्याचे कारण ऐकून पोलिसांनी चक्क डोक्याला हात लावला. देहूगावात राहणारी आठ आणि सहा वर्षाच्या दोन्ही भावांना आळंदी पाहण्याची इच्छा झाली म्हणून त्यांनी आई वडील घरी नसताना घर सोडले होते.

बेपत्ता नागरिकांची आकडेवारी –

(1 तृतीयपंथी)

प्रेमविवाह करण्यासाठी जोडीदारासोबत पळून जाणाऱ्यांची संख्याही मोठी आहे. अल्पवयीन मुले देखील अशा कारणासाठी घराचा उंबरा ओलांडतात. मात्र परिस्थितीचे गांभीर्य लक्षात येताच ही मुले असतील तेथून घरचा रस्ता धरतात. विवाहित महिला देखील वेगवेगळ्या कारणांसाठी कुटुंबाला सोडून निघून जातात. यावर्षी जानेवारी महिन्यात 189, फेब्रुवारी महिन्यात 211, मार्च महिन्यात 227 आणि एप्रिल महिन्यात 256 जण बेपत्ता झाले आहेत.

बेपत्ता व्यक्तींना शोधण्यासाठी मिसिंग ड्राइव्ह नावाने पोलिसांकडून अभियान चालवले जाते. त्यात इतर जिल्ह्यातील बेपत्ता लोकांची माहिती मागवली जाते. त्यात काहीजण मिळून येतात. इतर वेळी देखील बेपत्ता लोकांचा गांभीर्याने शोध घेण्याचे काम सुरु असते. पोलिसांच्या शोधमोहिमेत संबंधित बेपत्ता व्यक्तींच्या नातेवाईकांचा प्रतिसाद महत्वाची भूमिका बजावतो.

– पदमाकर घनवट, सहायक पोलीस आयुक्त, गुन्हे शाखा