पुणे : राज्याच्या राजकारणात काहीही होऊ शकतं कारण महाविकास आघाडी सरकारमध्ये शिवसेना, राष्ट्रवादी आणि काॅंग्रेसने सरकार पायउतार झाले आणि शिंदे फडणवीस सरकार स्थापन झालं. त्यानंतर अजित पवार ही भाजपसोबत सत्तेत गेले. या सर्व घडामोडीमुळे राज्यात वादंग निर्माण झाले असताना भाजपचे माजी खासदार संजय काकडे यांनी काल अजित पवार मुख्यमंत्री होतील असे म्हणत खळबळ उडवून दिली होती. त्यांनी आज राज्याचे उपमुख्यमंत्री अजितदादा पवार यांची देवगिरी या शासकीय निवासस्थानी सदिच्छा भेट घेतली.
अजित पवार यांनी राष्ट्रवादीच्या विरोधात बंड करत शिंदे -फडणवीस यांच्या महायुतीत प्रवेश केला अन् सत्ता स्थापन केली. राष्ट्रवादीत दोन गट पडल्याने कार्यकर्त्यांमध्ये संभ्रम निर्माण झाला आहे. यातच आता भाजपचे माजी खासदार संजय काकडे यांनी मोठं विधान केलं आहे. भाजपच्या वरिष्ठ नेत्यांनी अजित पवारांना मुख्यमंत्री पदाचा शब्द दिला असेल तर अजित पवार राज्याचे मुख्यमंत्री होतील असंही काकडे म्हटलं होते. त्यानंतर आज भाजपचे माजी खासदार संजय काकडे आणि राज्यसभेचे खासदार कोल्हापूरचे धनंजय महाडिक यांनी राज्याचे उपमुख्यमंत्री अजितदादा पवार यांची देवगिरी या त्यांच्या शासकीय निवासस्थानी सदिच्छा भेट घेतली. त्यामूळे राजकीय चर्चांना उधाण आले आहे.
भाजपसोबत आल्याचा अजित पवार यांना फायदा होणार आहे. राज्यात लोकसभेच्या ४८ पैकी ४५ जागा भाजप अन् मित्र पक्षाला मिळतील. राष्ट्रवादी काॅंग्रेसचे नेते छगन भुजबळ, धनंजय मुंडे, सुनिल तटकरे यांचा आम्हाला फायदाच होणार आहे. पुणे शहारात भाजपचे ९८ नगरसेवक आहेत. त्यामुळे ही जागा भाजपला मिळेल असंही त्यांनी सांगितले आहे. त्याच जागेसाठी अजित पवार यांना हाताशी धरत काकडे लोकसभेची वाट चोखाळत आहेत का अशा चर्चांना उधाण आले आहे.
