मुंबई- गेल्या काही दिवसापासून विधानसभेच्या विरोधी पक्षनेतेपदाची जागा रिक्त होती. या जागेवर काँग्रेस नेते विजय वड्डेटीवार यांच्या नावावर शिक्कामोर्तब करण्यात आले. सभाग्रहात आज त्यांच्या नावाची घोषणा झाल्यानंतर सर्वपक्षीय नेत्यांनी त्यांचे अभिनंदन केले. यावेळी बोलताना उपमुख्यमंत्री देवेंद्र फडणवीस यांनी विरोधी पक्षावर चिमटे काढले.
फडणवीस म्हणाले, विरोधी पक्षनेतेपदी विजय वड्डेटीवार यांची निवड झाल्याबद्दल मी त्यांचे अभिनंदन करतो. राज्याला विरोधी पक्षनेतेपदाची परंपरा लाभलेली आहे. या पदाचा मान सन्मान वाढवण्यासाठी ते प्रयत्न करतील. विदर्भाचे प्रश्न किंवा राज्याचे प्रश्न असतील ते नेहमी आवाज उठवतात. ते विरोधी पक्षनेत्याच महत्वाच काम असतं. मागच्या टर्ममध्ये त्यांनी कमी काळासाठी विरोधी पक्षनेते सांभाळलं आहे.
“२०१९ साल हे वेगळ्या प्रकारच वर्ष आहे अनेकांनी अनेक विक्रम केलेत. पहिले हिरो आमचे मुख्यमंत्री एकनाथ शिंदे आहेत त्यांनी सत्ता परिवर्तन केलं आणि ते मुख्यमंत्री म्हणून कारभार चालवत आहेत. यानंतर दुसरे हिरो म्हणजे आमचे अजितदादा आहेत. पहिल्यांदा माझ्यासोबत उपमुख्यमंत्री झाले, त्यानंतर उद्धव साहेबांसोबत उपमुख्यमंत्री झाले, नंतर विरोधीपक्षनेते झाले आणि आता आमच्यासोबत उपमुख्यमंत्री झाले. त्यांच्याखालोखाल मी आहे अगोदर मुख्यमंत्रीपदाची शपथ घेतली मग विरोधी पक्षनेता झाला, मग उपमुख्यमंत्री झालो आता यात काही बदल नाही. आता आम्ही ज्या पदावर आहे त्याच पदावर राहणार आहे. आता जी जबाबदारी मिळाली त्यात समाधान आहे, असा टोलाही देवेंद्र फडणवीस म्हणाले.
