पिंपरी : पिंपरी चिंचवड मधील “अभिषेक माने” या तरुणाने प्रतिष्ठित ‘रुबारू मिस्टर इंडिया एशिया पॅसिफिक 2023’ ची प्रतिष्ठित पदवी जिंकली आहे. याबद्दल माने यांचा राष्ट्रवादी काँग्रेसचे नेते व मा. विरोधी पक्षनेते, नगरसेवक नाना काटे यांनी अभिनंदन केले. रुबारू ग्रुपने आयोजित केलेली भारतातील सर्वात मोठी पुरुष सौंदर्य स्पर्धा यावर्षी गोव्यात आयोजित करण्यात आली होती.
देशभरातील एकूण 32 अंतिम स्पर्धकांनी मिस्टर इंडिया विजेतेपदासाठी स्पर्धा केली, त्यापैकी अभिषेक माने यांची ‘मिस्टर इंडिया एशिया पॅसिफिक’ विजेते म्हणून निवड करण्यात आली. आतापर्यंत, अभिषेक हा पुणे शहरातील एकमेव विजेता आहे जो या प्रतिष्ठित पुरुष सौंदर्य स्पर्धेत आंतरराष्ट्रीय विजेतेपद मिळविण्यासाठी पात्र ठरला आहे.
अभिषेक या वर्षी नोव्हेंबर २०२३ मध्ये लॅटिन अमेरिकन देश पेरू येथे होणाऱ्या आगामी ‘मिस्टर एशिया पॅसिफिक युनिव्हर्स’ स्पर्धेत भारताचे प्रतिनिधित्व करणार आहे. या अद्वितीय यशाबद्दल अभिषेक माने याचा सन्मान करत पुढील वाटचालीस नाना काटे यांनी शुभेच्छा दिल्या.
