पिंपरी : मद्यधुंद मजुरांमध्ये झालेल्या भांडणात एका मजुराचा मृत्यू झाला. किवळे येथे सोमवारी रात्री साडेबाराच्या सुमारास ही घटना घडली. विवेक गणेश पासवान (वय २४, मूळ रा. उत्तर प्रदेश), असे खून झालेल्या मजुराचे नाव आहे.
शिवकुमार घनश्याम प्रजापती (वय १९, मूळ बिरैचा कला, ता. रिधवली, जि. बस्ती, उत्तर प्रदेश) यांनी या प्रकरणी रावेत पोलिस ठाण्यात फिर्याद दिली. त्यानुसार दिनेश विलास यादव (वय २०, मूळ रा. बिरैचा कला, ता. रिधवली, जि. बस्ती, उत्तर प्रदेश) याच्या विरोधात पोलिसांनी गुन्हा दाखल केला.
पोलिसांनी दिलेल्या माहितीनुसार, मुंबई-पुणे महामार्गालगत किवळे येथे रुणाल गेटवे सोसायटीजवळ निर्माण माइल स्टोन ही बांधकाम साइट आहे. या साइटवर विवेक पासवान, दिनेश यादव आणि शिवकुमार प्रजापती यांच्यासह अन्य काही जण फरशी बसविण्याचे दि काम करतात. त्यातील विवेक हा इतर पाच जणांसह साइटवरील पत्र्याच्या खोलीत राहत होता. त्याचा आणि इतर मजुरांचा रविवारी पगार झाला. त्यामुळे विवेक याने काही मजुरांसह पार्टी केली. त्यानंतर विवेक याच्या खोलीतील इतर चौघे मजूर झोपले असता विवेक आणि दिनेश यादव पुन्हा मद्यपानासाठी गेले.
मद्यपान करून आल्यानंतर त्यांच्यामध्ये किरकोळ भांडण झाले. यात दिनेश यादव याने विवेक पासवानच्या तोंडावर सिमेंटची वीट मारली. यात गंभीर जखमी होऊन विवेक याचा मृत्यू झाला. दरम्यान, वायसीएम रुग्णालयात शवविच्छेदन करून विवेक याचा मृतदेह नातेवाइकांच्या ताब्यात देण्यात आला.
