शिर्डी: घरात बसून राज्य चालवता येत नाही त्यासाठी रस्त्यावर उतरावं लागतं, ग्राउंड रियालिटी समजून घ्यावी लागते, उंटावरून शेळ्या हाकता येत नाही. मी फेसबुक लाईव्ह करत नसून डायरेक्ट फेस टू फेस भेटतो, मी डॉक्टर नसलो तरी ऑपरेशन सक्सेस केलं. गळ्याचे पट्टे निघाले, हळू चालणारी माणसं जोरात चालू लागली, शेताचे बांध दिसू लागले, चमत्कार घडला, अशा शब्दात मुख्यमंत्री एकनाथ शिंदे यांनी पुन्हा एकदा उद्धव ठाकरेंचे नाव न घेता त्यांच्यावर निशाणा साधला आहे.
शिर्डी हे नरेंद्र मोदींचे श्रद्धेचे ठिकाण असल्यामुळे मोदींसाठी शिर्डीतून खासदार पाठवावाच लागेल त्यासाठी सदाशिव लोखंडे यांच्या पाठीशी उभे रहा, अशी साद मुख्यमंत्री एकनाथ शिंदे यांनी उपस्थितांना घातली आहे.
शिंदे पुढे म्हणाले की, समोर साईबाबा, मागे वीरभद्र महाराज.. म्हणजे सदाशिव लोखंडे यांचे धनुष्य दिल्लीत पोहचणार. शिर्डीत आल्यावर एक वेगळी अनुभूती येते. मागील निवडणुकीत विखे पाटलांच्या सहकार्याने सदाशिव लोखंडे खासदार झाले. आता महायुतीची ताकद प्रचंड वाढलीय. ६० वर्षात काँग्रेस काही कामं करू शकलं नाही. पुढील शंभर वर्षे देखील काँग्रेस मोदींसारखे काम करू शकणार नाही असे म्हटले आहे.
