पुणे : सन 2025 मध्ये होणाऱ्या इयत्ता दहावी आणि बारावीच्या परीक्षेच्या संभाव्य तारखा राज्य शिक्षण मंडळाने जाहीर केल्या आहेत. दहावीची लेखी परीक्षा 21 फेब्रुवारी 2025 तर बारावीची लेखी परीक्षा 11 फेब्रुवारी 2025 रोजी सुरु होणार आहे.
राज्य मंडळाच्या सचिव अनुराधा ओक यांनी याबाबत माहिती दिली आहे. महाराष्ट्र राज्य माध्यमिक व उच्च माध्यमिक शिक्षण मंडळाच्या वतीने पुणे, नागपूर, छत्रपती संभाजी नगर, मंबई, कोल्हापूर, अमरावती, नाशिक, लातूर, कोकण या नऊ विभागीय मंडळामार्फत दहावी व बारावीची परीक्षा घेण्यात येते. बारावीची परीक्षा फेब्रुवारी महिन्याच्या तिसऱ्या आठवड्यात तर दहावीच्या परीक्षा मार्च महिन्याच्या पहिल्या आठवड्यात आयोजित केली जाते.
बारावीचा ऑनलाईन निकाल मे अखेरीस तर दहावीचा ऑनलाईन निकाल जून महिन्याच्या पहिल्या आठवड्यात जाहीर होतो. त्यानंतर अनुत्तीर्ण, श्रेणी सुधार अंतर्गत प्रविष्ठ होणाऱ्या विद्यार्थ्यांसाठी जुलै-ऑगस्ट मध्ये पुरवणी परीक्षा घेतली जाते.
विद्यार्थ्यांचा सर्व अभ्यासक्रम वेळेत शिकवून पूर्ण व्हावा, विद्यार्थ्यांना अभ्यासासाठी पुरेसा वेळ मिळावा तसेच विद्यार्थ्यांनी परीक्षेचे दडपण घेऊ नये यासाठी राज्य मंडळाने पुढील वर्षी होणाऱ्या परीक्षांच्या संभाव्य तारखा जाहीर केल्या आहेत. दहावी बारावीच्या निकालावर पुढील शैक्षणिक वर्षाची प्रवेश प्रक्रिया अवलंबून असते. त्यामुळे वेळेत निकाल आणि पुढील प्रवेश होण्यासाठी मंडळाने (SSC/ HSC Exam) तारखा जाहीर केल्या आहेत.
दहावीची प्रात्यक्षिक, श्रेणी, तोंडी परीक्षा व अंतर्गत मूल्यमापन 3 फेब्रुवारी 2025 ते 20 फेब्रुवारी 2025 या कालावधीत होईल. तर लेखी परीक्षा 21 फेब्रुवारी 2025 ते 17 मार्च 2025 या कालावधीत होईल.
बारावीची प्रात्यक्षिक, श्रेणी, तोंडी परीक्षा व अंतर्गत मूल्यमापन 24 जानेवारी 2025 ते 10 फेब्रुवारी 2025 या कालावधीत होईल. तर लेखी परीक्षा 11 फेब्रुवारी 2025 ते 18 मार्च 2025 या कालावधीत होईल.
